மழை, வெள்ளத்தால் தத்தளிக்கும் வட மாநிலங்கள்!

வட இந்தியாவின் பல்வேறு மாநிலங்களில் தொடர் மழை மற்றும் வெள்ளத்தால் மக்களின் இயல்பு வாழ்க்கை பெரிதும் பாதிக்கப்பட்டுள்ளது.

- 

புது தில்லி, ஆக. 28: ஹிமாசல பிரதேசம், பஞ்சாப், உத்தர பிரதேசம், ராஜஸ்தான், பிகார், அஸ்ஸாம் உள்ளிட்ட மாநிலங்களில் தொடர் மழையால் ஆறுகள், அணைகளில் நீர்மட்டம் உயர்ந்து குடியிருப்புப் பகுதிகளையும், விவசாய நிலங்களையும் வெள்ள நீர் மூழ்கடித்துள்ளது. சாலைகள், பாலங்கள் மற்றும் கட்டடங்கள் வெள்ளத்தில் அடித்துச் செல்லப்பட்டன. பல கிராமங்கள் துண்டிக்கப்பட்டுள்ளன. தனிமைப்படுத்தப்பட்ட பகுதிகளில் சிக்கியவர்களை மீட்கும் பணியில் ராணுவம், தேசிய பேரிடர் மீட்புப் படை, எல்லை பாதுகாப்புப் படை மற்றும் மாநில அமைப்புகள் முழு வீச்சில் ஈடுபட்டு வருகின்றனர். பஞ்சாபில் வெள்ளம் சூழ்ந்த பகுதிகளில் சிக்கித் தவித்தவர்களை மீட்க, ராணுவத்தின் அனைத்து வகையான நிலப்பரப்பிலும் செல்லும் சிறப்பு வாகனங்களும் (ஏடிஓ ஆர் 1200), படகுகளும் பயன்படுத்தப்பட்டன. மீட்கப்பட்ட மக்களுக்கு நிவாரணப் பொருள்கள் மற்றும் உணவு வழங்கப்பட்டு, பாதுகாப்பான இடங்களுக்கு அழைத்துச் செல்லப்பட்டனர். ஹோஷியார்பூர் மாவட்டத்தில் மட்டும் இதுவரை 1,052 பேர் மீட்கப்பட்டுள்ளனர் என்று அதிகாரிகள் தெரிவித்தனர்.