விநாயகர் சதுர்த்தி: விற்பனைக்கு சிலைகள் தயார்

காஞ்சிபுரம் அருகே விநாயகர் சதுர்த்தி விழாவுக்காக விநாயகர் சிலைகள் தயாரிக்கும் பணிகள் நிறைவடைந்து விற்பனைக்கு தயாராக உள்ளன.

- 

காஞ்சிபுரம்/திருவள்ளூர்/செங்கல்பட்டு, ஆக. 24:

காஞ்சிபுரத்திலிருந்து வாலாஜாபாத் செல்லும் சாலையில் முத்தியால்பேட்டை, கன்னிகாபுரம், ஐயம்பேட்டை, ராஜம்பேட்டை உள்பட 50-க்கும் மேற்பட்ட ஊர்களில் விநாயகர் சிலைகள் தயாரிக்கப்பட்டு விற்பனைக்கு வைக்கப்பட்டுள்ளன. இந்தப் பகுதிகளில் தயாரிக்கப்படும் விநாயகர் சிலைகளில் பெரும்பாலானவை கொள்முதல் செய்யப்பட்டு தமிழகத்தின் பல்வேறு மாவட்டங்களுக்கு எடுத்துச் சென்று அங்கு வழிபாட்டுக்காக வைக்கப்படுவது பல ஆண்டுகளாக இருந்து வருகிறது.

காஞ்சிபுரம் அருகே நத்தப்பேட்டை ஊராட்சிக்கு உள்பட்ட கன்னிகாபுரத்தைச் சேர்ந்த விநாயகர் சிலை தயாரிப்பாளர் சிவலிங்கம் இது குறித்து கூறுகையில், சிறிதும் ரசாயன கலப்பில்லாத மரவள்ளிக்கிழங்கும், களிமண்ணும் இணைந்த கலவையால் விநாயகர் சிலைகளைத் தயாரிக்கிறோம். 5, 7, 9, 10 ஆகிய அடிகளில் விநாயகர் சிலைகள் அதிக அளவில் தயாரிக்கப்பட்டு, விற்பனைக்குத் தயார் நிலையில் உள்ளன. 10 அடிக்கு மேல் விநாயகர் சிலைகள் செய்யக்கூடாது என்பது அரசு விதி. எனவே 10 அடி உயர விநாயகர் சிலை ஆர்டர் பெற்றுத் தயாரிக்கப்படுகிறது.