சமாஜவாதி எம்.பி. அவதூறு கருத்து: மாநிலங்களவையில் பாஜக அமளி

எதிர்க்கட்சிகள் வெளிநடப்பு

- 

புது தில்லி, மார்ச் 28: ராஜபுத்திர மன்னர் ராணா சங்கா குறித்த அவதூறு கருத்துக்காக சமாஜவாதி மாநிலங்களவை எம்.பி. ராம்ஜி லால் சுமன் மன்னிப்புக் கேட்க வலியுறுத்தி, அந்த அவையில் பாஜக வெள்ளிக்கிழமை அமளியில் ஈடுபட்டது.

இதன் காரணமாக, அவை அலுவல்கள் சுமார் 30 நிமிஷங்களுக்கு ஒத்திவைக்கப்பட்டன. அவை மீண்டும் கூடியபோது இந்த விவகாரத்தை முன்வைத்து எதிர்க்கட்சிகள் வெளிநடப்பு செய்தன.

'தில்லி சுல்தான் இப்ராஹிம் லோடியை தோற்கடிக்க இந்தியாவுக்கு பாபரை அழைத்த ராணா சங்கா ஒரு துரோகி' என்று ராம்ஜி லால் சுமன் பேசியதாக ஒரு விடியோ சமீபத்தில் வெளியாகி சர்ச்சையை ஏற்படுத்தியது.

இதைத் தொடர்ந்து, உத்தர பிரதேச மாநிலம், ஆக்ராவில் உள்ள அவரது வீடு மீது ராஜபுத்திர சமூக அமைப்பான கர்ணி சேனை யைச் சேர்ந்தவர்கள் தாக்குதல் நடத்தினர்.