பிகார்: விடுபட்ட வாக்காளர்கள் ஆதாருடன் விண்ணப்பத்தைச் சமர்ப்பிக்க அனுமதி

உச்சநீதிமன்றம் உத்தரவு

- 

புது தில்லி, ஆக. 22: பிகார் வரைவு வாக்காளர் பட்டியலில் விடுபட்ட வாக்காளர்கள், ஆதார் அட்டை அல்லது அனுமதிக்கப்பட்ட கடவுச்சீட்டு உள்பட 11 ஆவணங்களில் ஏதாவது ஒன்றுடன் வாக்காளர் பட்டியலில் மீண்டும் பெயரைச் சேர்ப்பதற்கான விண்ணப்பத்தைச் சமர்ப்பிக்க அனுமதிக்குமாறு தேர்தல் ஆணையத்துக்கு உச்சநீதிமன்றம் வெள்ளிக்கிழமை உத்தரவிட்டது.

மேலும், பிகார் வரைவு வாக்காளர் பட்டியலில் 65 லட்சம் பேர் நீக்கம் செய்யப்பட்டது தொடர்பாக தேர்தல் ஆணையத்திடம் எந்தவொரு அரசியல் கட்சி தரப்பிலும் புகார் மனு சமர்ப்பிக்கப்படாததை சுட்டிக்காட்டிய உச்சநீதிமன்றம், வழக்கில் அவர்களை பிரதிவாதிகளாக சேர்க்குமாறு பிகார் மாநில தலைமைத் தேர்தல் அதிகாரிக்கு உத்தரவிட்டது.

பிகாரில் நிகழாண்டு இறுதியில் சட்டப்பேரவைத் தேர்தல் நடைபெற உள்ள நிலையில், அந்த மாநிலத்தில் வாக்காளர் பட்டியலில் சிறப்பு தீவிர திருத்தம் மேற்கொண்ட தேர்தல் ஆணையம், அந்தப் பணியை அண்மையில் நிறைவு செய்து வரைவு வாக்காளர் பட்டியலை கடந்த ஆக.1-ஆம் தேதி வெளியிட்டது. இதில், வாக்காளர்களாகப் பதிவு செய்திருந்த 65 லட்சம் பேரின் பெயர்கள் நீக்கம் செய்யப்பட்டது தெரியவந்தது.