வெற்றி பெறுமா விஜயின் வியூகம்...?

பொதுவாக இன்றைய ஜனநாயக நாடுகளில் இரண்டு கட்சிகள் ஆட்சி முறை வலுவாக உள்ளது.

- பண்ருட்டி எஸ்.ராமச்சந்திரன் முன்னாள் அமைச்சர்

மூன்றாவது ஒரு கட்சி, இரண்டில் ஒன்றை முறியடித்து வெற்றி பெறுவது முயற்சிதான். மூன்றாவது கட்சி தொடங்குவோர் ஏற்கனவே உள்ள இரு கட்சிகளின் அதிருப்தியாளர்கள், தனது ஆதரவாளர்கள், இரண்டு கட்சிகளையும் பிடிக்காமல் வாக்களிக்காமல் வீட்டில் இருக்கும் கணிசமான பிரிவினரும் தங்களை ஆதரிப்பார்கள் என்ற நம்பிக்கையில் தான் கட்சியைத் தொடங்குகின்றனர்.

இதில் கூர்ந்து கவனிக்க வேண்டியது என்னவென்றால் ஏற்கனவே உள்ள எதிர்க்கட்சியின் அதிருப்தியாளர்கள் மூன்றாவது கட்சியை ஆதரிப்பார்களா என்பது கேள்விக்குறி. பொதுவாக குறை சொல்வார்களே தவிர, அந்தந்த கட்சிக்கு வாக்களிப்பதுதான் இயல்பு. எப்போதுமே வாக்குச்சாவடிக்கு வராதவர்கள், புதிதாக ஈர்க்கப்படுவார்கள் என்பது சரியான கருத்தாக அமைவதில்லை. அவர்கள் வருவதே இல்லை என்பதுதான் உண்மை. ஆகவே, மூன்றாவது கட்சிக்கு மிச்சம்.

மூன்றாவது கட்சி மாற்றாக வருவதற்கு இவையெல்லாம் தடை. இருப்பினும், இவற்றையும் முறியடித்து இருமுனைப் போட்டியில் மூன்றாவதாக வந்து முதல் அல்லது இரண்டாவது இடத்தில் தங்களை நிலைநிறுத்திக்கொண்ட கட்சிகளும் உண்டு.

தமிழ்நாட்டில் 1950-களில் காங்கிரஸுக்கு மாற்றாக இடதுசாரி கட்சி இருந்தது. ஆனால், இனத்தின் பெயராலும், நாட்டின் பெயராலும் விடுதலை உணர்வை அண்ணா மக்களிடம் உருவாக்கி, அதன் மூலம் ஓர் உணர்ச்சிபூர்வமான இயக்கத்தை வளர்த்ததன் மூலம் 1967-இல் காங்கிரஸுக்கு மாற்றாக உருவெடுத்து ஆட்சியைப் பிடித்தார்.