செல்வத்துள் செல்வம் தமிழ்ச் செல்வம்!

நம் காலத்திலும் தமிழ்ச்செல்வத்தை நிறைய சேர்ப்போர் இருக்கத்தான் செய்கிறார்கள். வீடு நிறையப் பொன்னும் பொருளும் குவிப்பதற்கு மாறாக, அவற்றையெல்லாம் விட பெரிய செல்வமான நூல்களை தமிழ்ச்செல்வங்களாக நிறைய சேர்த்து வைத்திருக்கிறார்கள்.

- எழுத்தாளர்

செல்வம் என்ற சொல்லுக்குப் பல பொருள்கள் உண்டு. அவரவர்கள் தங்களுக்கு விருப்பமானதை செல்வமாகக் கொள்கிறார்கள். அவை பொருட்செல்வம், அருட்செல்வம் என்றெல்லாம் பகுபட்டாலும் திருவள்ளுவர் செல்வத்துள் செல்வமாகச் செவிச் செல்வத்தையே குறிப்பிடுகிறார். இதன் மூலமாகச் செல்வம் என்பது பெறப்படுவது எனத் தெரிகிறது. ஆனால் பெறப்பட்ட அந்தச் செல்வத்தின் பயன் 'கொடுப்பதால்தான்' கிடைக்கிறது என்றும் அவரே கூறுகிறார்.

பெறுவதைத்தான் நாம் ஊதியம் என்று கருதிக் கொண்டிருக்கிறோம். அதுவும் உடல்உழைப்புக்கான ஊதியம். ஆனால் உயிருக்கான ஊதியம் என்பது பெறுவதன்று, கொடுப்பது. 'ஈதலும் இசைபட வாழ்தலும் தான் உயிருக்கான ஊதியம்' என்கிறார்.

இப்படிச் செல்வங்கள் பலவகைப்படுகின்றன. செவிச்செல்வத்தைச் செல்வத்துள் செல்வம் என்கிறாரே வள்ளுவர், அப்படியானால் அது மொழிதானே... இசை தானே... அந்தச் செவிச் செல்வத்துள்ளும் உயர்ந்த செல்வமாக விளங்குவது எந்தச் செல்வமாக இருக்கும்?