ஆபரேஷன் சிந்து: ஈரானில் மீட்கப்பட்ட 110 மாணவர்கள் இந்தியா திரும்பினர்

ஆபரேஷன் சிந்து நடவடிக்கையின் கீழ், ஈரானிலிருந்து முதல்கட்டமாக மீட்கப்பட்ட இந்திய மாணவர்கள் 110 பேர், தில்லிக்கு வியாழக்கிழமை வந்தனர்.

- 

புது தில்லி, ஜூன் 19: இவர்களில் 90 பேர் ஜம்மு-காஷ்மீரைச் சேர்ந்தவர்கள்.

இஸ்ரேல்-ஈரான் இடையே போர் தீவிரமடைந்துள்ள நிலையில், ஈரானில் சிக்கியுள்ள இந்தியர்களை மீட்க 'ஆபரேஷன் சிந்து' சிறப்பு நடவடிக்கையை தொடங்கியது.

ஈரானில் 4000-க்கும் மேற்பட்ட இந்தியர்கள் வசிக்கின்றனர். இதில் பாதி பேர் மாணவர்கள் ஆவர். பெரும்பாலானோர் ஜம்மு-காஷ்மீரைச் சேர்ந்தவர்கள். ஈரானில் மருத்துவம், தொழில்முறை படிப்புகளை இவர்கள் பயின்று வருகின்றனர்.

ஈரானில் பல நகரங்கள் வான்வழி தாக்குதலுக்கு இலக்காகியுள்ள நிலையில், அங்கிருந்து முதல்கட்டமாக மீட்கப்பட்ட 110 இந்திய மாணவர்களுடன் முதலாவது விமானம், தில்லியை வியாழக்கிழமை அதிகாலை வந்தடைந்தது. மாணவர்களை வெளியுறவுத்துறை இணையமைச்சர் கீர்த்திவர்தன் சிங் நேரில் சென்று வரவேற்றார்.