இந்தியாவுடன் சிறப்பான நட்புறவு

அமெரிக்க அதிபர் டிரம்ப் புகழாரம்

- 

வாஷிங்டன், செப். 6: 'இந்தியாவும் அமெரிக்காவும் சிறப்பான நட்புறவைக் கொண்டுள்ளன. எனவே, கூடுதல் வரி விதிப்பு காரணமாக இரு நாடுகளிடையே தற்போது ஏற்பட்டுள்ள பதற்றமான சூழல் குறித்து கவலைப்படுவதற்கு ஒன்றுமில்லை' என்று அமெரிக்க அதிபர் டொனால்ட் டிரம்ப் வெள்ளிக்கிழமை தெரிவித்தார்.

மேலும், 'பிரதமர் நரேந்திர மோடியுடன் எனக்கு எப்போதும் நட்புறவு உண்டு. அவர் மிகச் சிறந்த பிரதமர். மிகச் சிறந்த மனிதர்' என்றும் டிரம்ப் குறிப்பிட்டார்.

'ஆழ்ந்த இருள் சூழ்ந்த சீனாவிடம் இந்தியாவையும், ரஷியாவையும் இழந்துவிட்டதுபோன்று தெரிகிறது' என்று வாஷிங்டனில் வியாழக்கிழமை டிரம்ப் கடும் அதிருப்தி தெரிவித்தது சர்வதேச அளவில் விவாதத்தை ஏற்படுத்திய நிலையில், அடுத்த நாளே தனது நிலைப்பாட்டை டிரம்ப் மாற்றியிருப்பது குறிப்பிடத்தக்கது.

இருதரப்பு வர்த்தக ஒப்பந்தப் பேச்சுவார்த்தையில் இழுபறி, உக்ரைன் மீது போர் தொடுத்துவரும் ரஷியாவிடமிருந்து தொடர்ந்து கச்சா எண்ணெய் கொள்முதல் செய்வது ஆகிய காரணங்களைக் காட்டி, இந்தியாவிலிருந்து இறக்குமதி செய்யப்படும் பொருள்கள் மீது அமெரிக்கா 50 சதவீத வரியை விதித்தது. இதன் காரணமாக, இரு நாடுகளிடையேயான உறவில் பின்னடைவு ஏற்பட்டது.