மாநிலத்துக்கான அதிகாரத்தை மீட்டெடுக்க வேண்டும்

சுதந்திர தின உரையில் முதல்வர் ஸ்டாலின்

- 

சென்னை, ஆக. 15: மாநிலத்திற்கான நிதியைப் பெற வாதாடி, போராடி, வழக்குத் தொடுக்க வேண்டிய நிலை இருப்பது கூட்டாட்சிக்கு அழகல்ல; அதிகாரம், நிதிப் பகிர்வில் மாநில அரசுகளின் பங்கை மீட்டெடுக்க வேண்டும் என்று சுதந்திர தின உரையில் முதல்வர் மு.க.ஸ்டாலின் குறிப்பிட்டார்.

சென்னை கோட்டை கொத்தளத்தில் தேசியக்கொடியை வெள்ளிக்கிழமை ஏற்றி வைத்து அவர் ஆற்றிய உரை: பல மாநிலங்கள், மொழிகள், பண்பாடுகள், பல மதங்களைச் சேர்ந்த கோடிக்கணக்கான மக்களை உள்ளடக்கிய துணைக் கண்டம்தான் இந்தியா. அனைத்து வேற்றுமைகளையும் கடந்து நாம் பீடுநடை போட, அனைவரும் இந்தியராக ஒருங்கிணைந்து செயல்படக் காரணம் அரசமைப்புச் சட்டம்தான்.

அம்பேத்கர் வகுத்தளித்த இந்த வரலாற்றுச் சாசனத்தில், மத்திய அரசும், மாநில அரசுகளும் இணைந்து மக்கள் பணியாற்றுவதற்குத் தேவையான அதிகாரப் பகிர்வு தெளிவாக வரையறுக்கப்பட்டுள்ளது.