டிரம்ப் எதிர்ப்புப் போராட்டம்: லாஸ் ஏஞ்சலீஸில் ஊரடங்கு உத்தரவு

அமெரிக்க அதிபர் டொனால்ட் டிரம்ப்பின் கடுமையான குடியேற்றக் கொள்கைகளுக்கு எதிராக லாஸ் ஏஞ்சலீஸ் நகரில் நடைபெற்றுவரும் போராட்டங்கள் மேலும் தீவிரமடைந்ததைத் தொடர்ந்து அங்கு ஊரடங்கு உத்தரவு பிறப்பிக்கப்பட்டது.

- 

லாஸ் ஏஞ்சலீஸ், ஜூன் 11:

இது குறித்து அசோசியேட்டட் பிரஸ் செய்தி நிறுவனம் தெரிவித்ததாவது: குடியேற்றங்களைக் கட்டுப்படுத்தும் டிரம்ப்பின் அதிரடி நடவடிக்கைகளுக்கு எதிர்ப்பு தெரிவித்து கலிபோர்னியா மாகாணத்தின் லாஸ் ஏஞ்சலீஸ் நகரில் தீவிரமடையும் போராட்டத்தைக் கட்டுப்படுத்துவதற்காக நகர நிர்வாகம் ஊரடங்கு உத்தரவு பிறப்பித்தது. செவ்வாய்க்கிழமை இரவு அந்த ஊரடங்கு உத்தரவு அமலுக்கு வந்த உடனேயே, நூற்றுக்கணக்கான போராட்டக்காரர்களைக் கைது செய்யும் நடவடிக்கையை காவல்துறையினர் தொடங்கினர். குதிரைகளில் வந்த காவலர்கள் ரப்பர் குண்டுகளால் சுட்டும், கண்ணீர் புகை குண்டுகளை வீசியும் போராட்டக்காரர்களைக் கலைக்க முயன்றனர். தேசிய காவல் படையினர் பிளாஸ்டிக் கேடயங்களுடன் பாதுகாப்பு பணியில் ஈடுபட்டனர். ஆனால் கைது நடவடிக்கைகளில் பங்கேற்கவில்லை. பின்னர் சில போராட்டக்காரர்கள் அங்கிருந்து கலைந்து சென்றனர். இருந்தாலும், போராட்டக்காரர்களுக்கும் போலீஸாருக்கும் சிறிய அளவிலான மோதல்கள் தொடர்ந்தன.