மக்களாட்சியைக் காப்பாற்ற...

இது மகாத்மா காந்தியின் தேசம். வாக்களிப்பதற்கு பணம் வாங்குவது, தியாகம் செய்து நம் தலைவர்கள் வாங்கிய சுதந்திரத்தை அவமானப்படுத்துவது; அரசமைப்புச் சாசனத்தை அவமதிப்பது; மக்களாட்சியை மாண்பிழக்கச் செய்வதாகும்.

- க.பழனித்துரை

மக்களாட்சி சிதிலமடைகிறது; அதை நாம் சீர்படுத்த வேண்டும். அரசியல் வன்முறை நிறைந்ததாக மாறிவிட்டது. எப்போது நம் அரசியல் திருந்துமோ? என புலம்பாத சமூகக் கண்ணோட்டம் கொண்ட பொதுமக்கள் இல்லை. இந்தப் புலம்பலால் நம் மக்களாட்சி மேம்படுமா என்பதுதான் நம் கேள்வி. நம் மக்களாட்சி மாண்புற, புலம்பலை விட்டுவிட்டு வீட்டைவிட்டு வெளியேறி மக்களிடம் சென்று பணி செய்தால் மட்டுமே நிலைமை மாறும். மாற்றத்துக்கான விதைகள் ஆங்காங்கே விதைக்கப்படுகின்றன. இந்த விதைப்பால் ஒரு நாள் நாம் நல்ல அறுவடையைச் செய்யலாம்.

ஒரு கிராமத்துக்குச் சென்று அரசமைப்புச் சாசனத்தை மக்கள் சாசனமாக்குவோம் என்ற கலந்துரையாடலை அந்த கிராமத்து மக்களிடம் நடத்தினோம். அப்போது கிராமத்து பெண்களிடம் ஒரு கேள்வி முன்வைக்கப்பட்டது. உங்கள் ஊரின் சிறப்பென்ன என்பதுதான் அந்த கேள்வி. ஒரு பெண் எழுந்து, "எங்கள் ஊரில் தேர்தலின்போது வாக்குக்குப் பணம் வாங்குவதில்லை" என்றார். இன்னொரு பெண், "எங்கள் ஊரில் ஜாதியப் பாகுபாடு, ஜாதிய மோதல் கிடையாது. அனைவரும் அமைதியாக வாழ்கிறோம்" என்றார்.

புதிய இந்தியாவை உருவாக்கும் பொறுப்பை அரசமைப்புச் சாசனம் அரசியல் கட்சிகளிடம் ஒப்படைக்கவில்லை, மக்களாகிய நம்மிடம்தான் ஒப்படைத்துள்ளது. மக்களாகிய நாம் குடிமக்களாக, இந்தியர்களாக, ஒன்றிணைந்து இந்த நாட்டையும் நாட்டு மக்களையும் காக்க செயல்பட வேண்டும், அப்படிச் செயல்படுவதன் மூலம் குடிமக்களாகிய நாம் அரசியல் கட்சிகளுக்கு வழிகாட்ட வேண்டும்" என்று கூறி நிகழ்வை முடித்துவிட்டு வெளியேறினோம்.

அந்த ஊரின் பஞ்சாயத்துத் தலைவர் அதற்கு முன்பு வெளிநாட்டில் கூலி வேலை செய்து வந்திருக்கிறார். உள்ளாட்சித் தேர்தலின்போது ஊருக்கு வந்து தேர்தலில் போட்டியிட்டு வெற்றி பெற்றிருக்கிறார். வாக்களிப்பதற்கு எந்தப் பணமும் மக்களுக்கு அவர் கொடுக்கவில்லை.