குடியரசுத் தலைவருக்கு காலக்கெடு விதிக்கும் தீர்ப்பு: அவசரச் சட்டம் கொண்டு வர மத்திய அரசு பரிசீலனை

சட்டப்பேரவை களில் நிறைவேற்றப்படும் மசோதாக்கள் விவகாரத்தில் ஆளுநர்கள் மற்றும் குடியரசுத் தலைவருக்கு காலக்கெடு விதித்து உச்சநீதிமன்றம் அண்மையில் அளித்த தீர்ப்பின் அமலாக்கத்தைத் தடுக்கும் வகையில் அரசமைப்புச் சட்டத்தில் திருத்தம் செய்ய வகை செய்யும் அவசரச் சட்டத்தை கொண்டு வரும் வாய்ப்பை மத்திய அரசு ஆராய்ந்து வருகிறது.

- நமது சிறப்பு நிருபர்

புது தில்லி, ஏப். 17: சட்டப்பேரவை களில் நிறைவேற்றப்படும் மசோதாக்கள் விவகாரத்தில் ஆளுநர்கள் மற்றும் குடியரசுத் தலைவருக்கு காலக்கெடு விதித்து உச்சநீதிமன்றம் அண்மையில் அளித்த தீர்ப்பின் அமலாக்கத்தைத் தடுக்கும் வகையில் அரசமைப்புச் சட்டத்தில் திருத்தம் செய்ய வகை செய்யும் அவசரச் சட்டத்தை கொண்டு வரும் வாய்ப்பை மத்திய அரசு ஆராய்ந்து வருகிறது.

இது தொடர்பாக தில்லியில் பிரதமர் நரேந்திர மோடி இரு தினங்களுக்கு முன்பு குடியரசுத் தலைவர் திரௌபதி முர்முவை சந்தித்த போது ஆலோசனை நடத்தியதாகவும், அதன் தொடர்ச்சியாக சட்ட வல்லுநர்களுடன் பிரதமர், மத்திய சட்டத் துறை அமைச்சர் ஒருகட்டமாகவும் அமைச்சரவையில் உள்ள மூத்த அமைச்சர்கள் தனியாகவும் கூடி ஆலோசனை நடத்தியுள்ளதாகவும் மத்திய அரசு வட்டாரங்கள் தெரிவித்தன.