டிரம்ப்பின் வரி விதிப்பு: உலக நாடுகள் எதிர்ப்பு

பிற நாடுகள் தங்கள் பொருள்களுக்கு விதிக்கும் வரி விகிதங்களுக்கு ஏற்ப, அந்த நாடுகளின் பொருள்களுக்கு அமெரிக்க அதிபர் டொனால்ட் டிரம்ப் அறிவித்துள்ள பரஸ்பர வரி விதிப்பு சர்வதேச அளவில் கொந்தளிப்பை ஏற்படுத்தியுள்ளது.

- 

வாஷிங்டன், ஏப். 3:

உலகம் முழுவதும் பங்குச் சந்தை களும் வர்த்தக பரிவர்த்தனைகளும் வியாழக்கிழமை நிலைகுலைந்தன. அமெரிக்காவின் நெருங்கிய வர்த்தகக் கூட்டாளிகள் முதல் பொருளாதார நெருக்கடியில் சிக்கித் தவிக்கும் நாடுகள் வரை பாரபட்சம் பாராமல் டிரம்ப் அறிவித்துள்ள வரி விதிப்புக்கு உலகின் பல்வேறு நாடுகளும் தங்களது கடுமையான எதிர்ப்பைப் பதிவு செய்துள்ளன. அவற்றில் சில:

சீனா: சீனாவில் இருந்து இறக்குமதியாகும் பொருள்களுக்கு 34 சதவீத கூடுதல் வரி விதித்துள்ளார் டிரம்ப். இதற்கு கடும் கண்டனம் தெரிவித்துள்ள சீன வர்த்தகத் துறை அமைச்சகம், புதிய வரிவிதிப்பை டிரம்ப் உடனடியாகத் திரும்பப் பெற வேண்டும் என்று வலியுறுத்தியுள்ளது.

இது குறித்து அமைச்சகம் வியாழக்கிழமை வெளியிட்டுள்ள அறிக்கையில், 'அமெரிக்க அதிபரின் இந்த நடவடிக்கை சர்வதேச பொருளாதார மேம்பாட்டுக்கு அபாயத்தை ஏற்படுத்தியுள்ளது. இதனால் ஏற்படும் பொருளாதாரப் போரில் யாரும் வெற்றிவாகை சூட முடியாது' என்று எச்சரிக்கப்பட்டுள்ளது.