மெய்த்தன்மையை அறிதல் நன்று!

நம் நாட்டிலேயே உரிய வேலைவாய்ப்புகள் இருந்தும் அதிகமான சம்பளம் என்கிற தூண்டுதலால் வெளிநாடுகளுக்கு வேலை தேடிச் செல்லும் நம் நாட்டு இளைஞர்களின் எண்ணிக்கை அதிகரித்து வருகிறது.

- இரா.சாந்தகுமார்

நம் நாட்டிலேயே உரிய வேலைவாய்ப்புகள் இருந்தும் அதிகமான சம்பளம் என்கிற தூண்டுதலால் வெளிநாடுகளுக்கு வேலை தேடிச் செல்லும் நம் நாட்டு இளைஞர்களின் எண்ணிக்கை அதிகரித்து வருகிறது. இளைஞர்கள் சிலரின் அறியாமையைப் பயன்படுத்தி, அரசால் அங்கீகரிக்கப்படாத முகவர்கள் இவர்களை வெளிநாடுகளுக்கு அனுப்பி, அந்நாடுகளில் பல்வேறு சைபர் குற்றங்களில் அவர்களை ஈடுபடுத்துகின்றனர். வெளிநாடுகளில் வேலை வாங்கித் தருவதாக அவ்வப்போது விளம்பரம் செய்யும் மோசடி நிறுவனங்கள், முகவர்கள் குறித்து மத்திய அரசு எச்சரிக்கை செய்தாலும், போலி நிறுவனங்களிடம் ஏமாறும் இளைஞர்களின் எண்ணிக்கை குறையவில்லை.

ஆப்பிரிக்க நாடுகளில் ஒன்றான லிபியாவில் உள்ள சிமெண்ட் தொழிற்சாலையில் அதிகச் சம்பளம் கிடைக்கும் வேலை என்ற ஆசை காட்டி போலி முகவர்கள் மூலம் அழைத்துச் செல்லப்பட்ட வட மாநிலத்தைச் சேர்ந்த 16 இளைஞர்கள், அங்கு சென்ற பிறகு சிறைச்சாலை போன்ற சூழலில் அடைக்கப்பட்டு, அடிப்படைத் தேவைகளான உணவு, கழிப்பிடம் போன்றவைகூட அளிக்கப்படாமல் இரவு, பகலாக வேலை செய்ய நிர்ப்பந்திக்கப்பட்டிருக்கிறார்கள்.

இதில் குறிப்பிடத்தக்க அம்சம், லிபியாவில் நடக்கும் உள்நாட்டுப் போரை முன்னிட்டு பாதுகாப்புக் காரணங்களுக்காக, 2016 ஆம் ஆண்டு முதல் லிபியாவுக்குச் செல்ல நம் நாட்டவருக்குத் தடை விதிக்கப்பட்டிருக்கிறது என்பதுதான்.