நீதிபதி யஷ்வந்த் வர்மா மீது எஃப்ஐஆர் பதிவுசெய்யக் கோரி மனு: விசாரணைக்கு ஏற்க உச்சநீதிமன்றம் மறுப்பு

வீட்டில் கட்டு கட்டாகப் பணம் கண்டறியப்பட்ட வழக்கில் உயர்நீதிமன்ற நீதிபதி யஷ்வந்த் வர்மா மீது காவல் துறையில் முதல் தகவல் அறிக்கை (எஃப்ஐஆர்) பதிவு செய்ய வலியுறுத்தி தாக்கல் செய்த மனுவை விசாரணைக்கு ஏற்க உச்சநீதிமன்றம் புதன்கிழமை மறுத்தது.

- 

புது தில்லி, மே 21: வீட்டில் கட்டு கட்டாகப் பணம் கண்டறியப்பட்டு வழக்கில் உயர்நீதிமன்ற நீதிபதி யஷ்வந்த் வர்மா மீது காவல் துறையில் முதல் தகவல் அறிக்கை (எஃப்ஐஆர்) பதிவு செய்ய வலியுறுத்தி தாக்கல் செய்த மனுவை விசாரணைக்கு ஏற்க உச்சநீதிமன்றம் புதன்கிழமை மறுத்தது.

இந்த விவகாரம் தொடர்பாக துறை சார்ந்த விசாரணைக் குழுவின் அறிக்கையை குடியரசுத் தலைவருக்கும், பிரதமருக்கும் உச்சநீதிமன்றத் தலைமை நீதிபதி அனுப்பி வைத்துள்ளார். எனவே, இந்தச் சூழலில் இத்தகைய மனு தேவையற்றது என்று உச்சநீதிமன்றம் அப்போது குறிப்பிட்டது.

தில்லி உயர்நீதிமன்ற நீதிபதியாக யஷ்வந்த் வர்மா பதவி வகித்தபோது, அங்கு அவர் வசித்த அதிகாரபூர்வ இல்லத்தில் கடந்த மார்ச் 14-ஆம் தேதி தீ விபத்து ஏற்பட்டது. அப்போது, அங்குள்ள அறையில் பாதி எரிந்த மூட்டை களில், கட்டுக்கட்டாகப் பணம் இருந்தது கண்டறியப்பட்டது. அந்தப் பணம் பின்னர் மாயமானது.