ராகுல் பேச அனுமதி மறுப்பு: ஓம் பிர்லாவுடன் எதிர்க்கட்சி எம்.பி.க்கள் சந்திப்பு

மக்களவை எதிர்க்கட்சித் தலைவர் ராகுல் காந்திக்கு பேச அனுமதி மறுக்கப்பட்டது எனக் கூறப்படும் விவகாரத்துக்கு கண்டனம் தெரிவித்து அவைத் தலைவர் ஓம் பிர்லாவை வியாழக்கிழமை சந்தித்த எதிர்க்கட்சி எம்.பி.க்கள் அவரிடம் கடிதம் வழங்கினர்.

- 

புது தில்லி, மார்ச் 27:

மக்களவை காங்கிரஸ் துணைத் தலைவர் கௌரவ் கோகோய் தலைமையில் சென்ற இந்தக் குழுவில் திமுக, திரிணமூல் காங்கிரஸ், சமாஜவாதி, ராஷ்ட்ரீய ஜனதா தளம், மதிமுக, இந்திய யூனியன் முஸ்லிம் லீக் உள்ளிட்ட 'இண்டி' கூட்டணி எம்.பி.க்கள் இடம்பெற்றிருந்தனர்.

இதுகுறித்து செய்தியாளர்களிடம் கௌரவ் கோகாய் கூறியதாவது: சிவசேனை (உத்தவ் பிரிவு) உள்பட பல்வேறு எதிர்க்கட்சி எம்.பி.க்களின் கையொப்பம் பெற்ற இந்தக் கடிதத்தை அவைத் தலைவர் ஓம் பிர்லாவிடம் வழங்கினோம். மக்களவையின் மாண்பு, கலாசாரம் மற்றும் விதிகளை ஆளும் பாஜக எவ்வாறெல்லாம் மீறுகிறது என்பதை அவரிடம் விளக்கி எங்கள் ஏமாற்றம் மற்றும் கண்டனத்தை பதிவு செய்தோம்.

மக்களவை எதிர்க்கட்சித் தலைவர் ராகுல் காந்திக்கு பேச அனுமதி மறுக்கப்பட்ட விவகாரத்தில் அவரை ஓம் பிர்லா கண்டித்து விதி 349-இன்படி நடந்துகொள்ளுமாறு கூறினார். ஆனால் அதுகுறித்த தெளிவான விளக்கம் தெரியவில்லை. அவர் கூறியதைத் திரித்து பாஜக தகவல் தொழில்நுட்ப அணியினர் அரசியலாக்கி வருகின்றனர்.

ராகுல் காந்தி பேச எழுந்தவுடன் மக்களவை ஒத்திவைக்கப்பட்டது. எதிர்க்கட்சித் தலைவர் பொறுப்பானது அரசமைப்புச் சட்டத்தால் நிறுவப்பட்டது. ஆனால் அவரை விமர்சித்து கூறப்பட்ட சில கருத்துகளுக்குப் பதில் கூற அனுமதி வழங்கப்படவில்லை என்றார்.