அமெரிக்கா-ஈரான் போர்: நாளை அமைதி ஒப்பந்தம்?

'அமெரிக்கா- ஈரான் இடையே கடந்த 3 மாதங்களாக நடந்துவரும் போரை முடிவுக்குக் கொண்டு வருவதற்கான அமைதி ஒப்பந்தம் இந்த வார இறுதியில் (ஞாயிற்றுக்கிழமை) கையொப்பமாகலாம்' என்று அமெரிக்க அதிபர் டொனால்ட் டிரம்ப் தெரிவித்தார்.

- 

இந்த ஒப்பந்தம் ஜெனீவாவில் அமெரிக்க துணை அதிபர் ஜே.டி.வான்ஸ், ஈரான் நாடாளுமன்ற அவைத் தலைவர் முகமது பாகர் கலிபாஃப் ஆகியோரால் கையொப்பமிடப்படலாம் என்று மேற்கத்திய வட்டாரங்கள் தெரிவிக்கின்றன.

ஈரான் அணுசக்தி திட்டத்துக்கு எதிராக அந்நாடு மீது அமெரிக்கா, இஸ்ரேல் கடந்த பிப். 28-இல் போரைத் தொடங்கின. இதையடுத்து, அமெரிக்க தளங்கள் அமைந்த வளைகுடா நாடுகள் மீது ஈரான் பதில் தாக்குதல்களைத் தொடுத்தது.

ஈரானுக்கு ஆதரவாக லெபனானின் ஹிஸ்புல்லா அமைப்பும் களமிறங்கியதால், முழு அளவிலான பிராந்தியப் போர் வெடித்தது. இந்நிலையில், இருதரப்புக்கு இடையே கடந்த ஏப்ரல் தொடக்கத்தில் தற்காலிக போர் நிறுத்தம் எட்டப்பட்டு, அமைதிப் பேச்சுவார்த்தைகள் நடைபெற்று வந்தன.