மழை-வெள்ளம்: பஞ்சாபுக்கு ரூ.1,600 கோடி, ஹிமாசலுக்கு ரூ.1,500 கோடி

நேரில் ஆய்வு செய்த பின் பிரதமர் அறிவிப்பு

- 

சிம்லா, செப். 9: பஞ்சாப், ஹிமாசல பிரதேச மாநிலங்களில் மழை-வெள்ள பாதிப்புகளை பிரதமர் நரேந்திர மோடி செவ்வாய்க்கிழமை நேரில் பார்வையிட்டு ஆய்வு செய்தார்.

இந்த இயற்கைப் பேரிடரின் தீவிரத்தைக் கருத்தில் கொண்டு, பஞ்சாபுக்கு கூடுதல் நிவாரண நிதியாக ரூ.1,600 கோடியும், ஹிமாசலுக்கு உடனடி நிவாரண நிதியாக ரூ.1,500 கோடியும் வழங்கப்படும் என அவர் அறிவித்தார்.

மழையால் உயிரிழந்தோரின் குடும்பங்களுக்கு தலா ரூ.2 லட்சம், காயமடைந்தோருக்கு தலா ரூ.50,000 வழங்கப்படும் என்ற அறிவிப்பையும் அவர் வெளியிட்டார்.

ஹிமாசல பிரதேசம், பஞ்சாப் உள்ளிட்ட மாநிலங்களில் கடந்த சில வாரங்களாக பலத்த மழையால் பெரும் சேதங்கள் நேரிட்டுள்ளன. பஞ்சாப் கடந்த 1988-க்குப் பிறகு மோசமான பாதிப்பை எதிர்கொண்டுள்ளது. இந்த மாநிலத்தில் 2,000-க்கும் மேற்பட்ட கிராமங்கள் பாதிக்கப்பட்டுள்ளன. 1.84 லட்சம் ஹெக்டேருக்கும் மேல் பயிர்ச்சேதங்கள் ஏற்பட்டுள்ளன.

மழை தொடர்பான அசம்பாவித சம்பவங்களில் 51 பேர் உயிரிழந்துள்ளனர். ரூ.13,000 கோடிக்கும் மேல் சேதம் ஏற்பட்டுள்ளதாக மாநில அரசு மதிப்பிட்டுள்ளது.