வேளாண்மையில் காலநிலை மாற்ற சவாலை எதிர்கொள்ள முன்மாதிரித் திட்டம்

காலநிலை மாற்றத்தை எதிர்கொண்டு விவசாயம் செய்ய முன்மாதிரித் திட்டம் வகுக்கப்பட்டுள்ளதாக வேளாண்மைத் துறை செயலர் வ.தட்சிணாமூர்த்தி கூறினார்.

- 

சென்னை, மார்ச் 15:

வேளாண்மை நிதிநிலை அறிக்கையில் உள்ள முக்கிய அம்சங்கள் குறித்து தலைமைச் செயலகத்தில் செய்தியாளர்களுக்கு அவர் சனிக்கிழமை அளித்த பேட்டியில் கூறியது: 5-ஆவது வேளாண்மை நிதிநிலை அறிக்கை தாக்கல் செய்யப்பட்டது. இதில், அனைத்து மாவட்டங்களையும் உள்ளடக்கி சம அளவிலான திட்டங்கள் தீட்டப்பட்டுள்ளன. அனைத்து விதமான மக்களுக்கும் திட்டங்களின் பலன்கள் சேரும் வகையில் நடவடிக்கைகள் எடுத்துள்ளோம். இயற்கை வேளாண்மைக்கு முக்கியத்துவம் அளித்துள்ளதுடன், ஊட்டச்சத்து பாதுகாப்பையும் உறுதி செய்துள்ளோம்.

வேளாண்மைக்கு ஆட்கள் பற்றாக்குறை உள்ள சூழலில், இயந்திரமயமாக்கலின் தேவையும், அதன் பயன்பாட்டை அதிகரிப்பதும் அவசியமானதாக உள்ளது.

இதைக் கருத்தில் கொண்டு வேளாண் இயந்திரமயமாக்கலுக்கு அதிக அளவு நிதிகளை ஒதுக்கியுள்ளோம்.