பதற்றமான உலகில் அமைதிக்கான பாதை யோகா

பிரதமர் மோடி

- 

விசாகப்பட்டினம், ஜூன் 21: உலகின் பல்வேறு பிராந்தியங்களும் ஏதோ ஒருவித பதற்றத்தை எதிர்கொண்டு வரும் நிலையில், அமைதி மற்றும் ஒருமைப்பாட்டுக்கான பாதையாக விளங்குகிறது யோகா என்று பிரதமர் நரேந்திர மோடி தெரிவித்தார். மன அமைதியை உலகளாவிய கொள்கையாகக் கொண்ட மனிதகுலத்தின் தொடக்கமாக இந்த யோகா தினம் குறிக்கப்பட வேண்டும் என்றும் அவர் வலியுறுத்தினார்.

இந்தியாவின் முன்னெடுப்பால், கடந்த 2015-இல் இருந்து ஒவ்வோர் ஆண்டும் ஜூன் 21-ஆம் தேதி சர்வதேச யோகா தினம் கொண்டாடப்பட்டு வருகிறது.

நிகழாண்டு 11-ஆவது சர்வதேச யோகா தினம் சனிக்கிழமை (ஜூன் 21) உற்சாகத்துடன் கொண்டாடப்பட்டது. இந்தியா மட்டுமன்றி, உலகெங்கிலும் யோகா நிகழ்ச்சிகள் நடைபெற்றன.

ஆந்திர மாநிலத்தில் உள்ள துறைமுக நகரான விசாகப்பட்டினம் கடற்கரையில் பிரதமர் மோடி தலைமையில் மிக பிரம்மாண்டமான யோகா நிகழ்ச்சி நடைபெற்றது. பிரபல சுற்றுலாத் தலமான ஆர்.கே. கடற்கரையில் இருந்து போகபுரம் வரை 26 கி.மீ. தொலைவிலான சாலையில் நடைபெற்ற இந்நிகழ்ச்சியில் 3 லட்சத்துக்கும் மேற்பட்டோர் பங்கேற்றனர். பிற பங்கேற்பாளர்களுடன் இணைந்து பிரதமர் மோடி யோகப் பயிற்சிகளை மேற்கொண்டார்.