தில்லியில் பரவலாக மழை: போக்குவரத்து நெரிசலால் மக்கள் அவதி!

தேசியத் தலைநகரில் செவ்வாய்க்கிழமை பெய்த மழையால் நகரத்தின் பல்வேறு பகுதிகளில் தண்ணீர் தேங்கி போக்குவரத்து நெரிசல் ஏற்பட்டது.

- நமது நிருபர்

நமது நிருபர் புது தில்லி, ஜூலை 22: இதனால், அலுவலங்களுக்கும், பள்ளிகளுக்கும் குறித்த நேரத்தில் செல்ல முடியாததால் மக்கள் அவதிக்குள்ளாகினர்.

தெற்கு தில்லி, தென்கிழக்கு தில்லி, ஐடிஓ முதல் பழைய ரோஹ்தக் சாலை, தில்லி - ஜெய்ப்பூர் நெடுஞ்சாலை (என்எச்-8) மெஹ்ரெளலி - பதர்பூர் சாலை, மெஹ்ரெளலி - குருகிராம் சாலை, பீரா கர்ஹி முதல் ஐஎஸ்பிடி, மதுபன் சௌக், தில்லி - காஜியாபாத் பகுதி மற்றும் தேசிய நெடுஞ்சாலை-9 வரை பல மணி நேரம் பலத்த வாகன நெரிசல் ஏற்பட்டதாக தெரிவிக்கப்பட்டுள்ளது. அதிகப்படியான தண்ணீரை வெளியேற்ற சிரமம் ஏற்பட்டது.

மெஹ்ரெளலி - பதர்பூர் பாதை மிகவும் பாதிக்கப்பட்டது. பிற்பகல் வரை போக்குவரத்து சீரடைய நேரம் ஏற்பட்டது. வாகன ஓட்டிகள் ஒரு மணி நேரம் வரை தாமதம் ஏற்பட்டதாகத் தெரிவித்தனர். பல பயணிகள் தங்கள் விரக்தியை 'எக்ஸ்' தளத்தில் வெளிப்படுத்தினர்.