'போரில் சட்டதிட்டங்களைப் பின்பற்றவில்லை'

இஸ்ரேல் முன்னாள் முப்படை தளபதி ஒப்புதல்

- 

ஜெருசலேம், செப். 13: ஹமாஸுடனான போரில் தங்களது படையினர் சர்வதேச சட்டதிட்டங்களைப் பின்பற்றவில்லை என்று, 17 மாதங்களாக அந்தப் போரை நடத்திய இஸ்ரேல் முப்படை தளபதி ஹெர்ஸி ஹலேவி ஒப்புக் கொண்டுள்ளார்.

மேலும், காஸாவில் இஸ்ரேல் நடத்திய தாக்குதலில் உயிரிழந்தவர்கள் மற்றும் காயமடைந்தவர்களின் எண்ணிக்கை குறித்து ஹமாஸின் சுகாதாரத் துறை அமைச்சகம் வெளியிட்டுவரும் புள்ளிவிவரங்களை உறுதிப்படுத்தும் வகையில், 2 லட்சத்துக்கும் மேற்பட்ட பாலஸ்தீனர்கள் கொல்லப்பட்டுள்ளனர் அல்லது காயமடைந்துள்ளனர் என்று அவர் கூறினார்.

கடந்த 2023-ஆம் ஆண்டு அக்டோபர் 7-ஆம் தேதி இஸ்ரேலுக்குள் நுழைந்து ஹமாஸ் படையினர் தாக்குதல் நடத்தியபோது, ஈன் ஹபேசோர் என்ற பகுதியில் வசிப்பவர்கள் அங்கு நடைபெற்ற தாக்குதலை வெற்றிகரமாக முறியடித்தனர்.

அவர்களுடன் நடைபெற்ற சந்திப்பு நிகழ்ச்சியில் ஹெர்ஸி ஹலேவி பேசியதாவது: காஸா மீதான தாக்குதலில் அங்கு வசித்துவந்த 22 லட்சம் பேரில் 10 சதவீதத்துக்கும் மேலானவர்கள் கொல்லப்பட்டுள்ளனர்; அல்லது காயமடைந்தனர். அந்த எண்ணிக்கை 2 லட்சத்தை விட மிகவும் அதிகம்.

இது ஒரு நாகரிகமான போர் இல்லை; யாரும் நீதி, நேர்மையை மனதில் நிறுத்தி நடந்துகொள்ளவில்லை.