பஞ்சாபில் பயங்கரவாத தாக்குதல்களில் தொடர்புடைய இந்தியர் அமெரிக்காவில் கைது

பஞ்சாப் மாநிலத்தில் பல்வேறு பயங்கரவாத தாக்குதல்களில் தொடர்புடையதாக இந்தியாவால் தேடப்பட்டுவரும் சீக்கியரை அமெரிக்காவில் அந்நாட்டு புலனாய்வு அமைப்பான எஃப்.பி.ஐ கைது செய்துள்ளது.

- 

நியூயார்க், ஏப்.18:

பஞ்சாப் மாநிலம் அமிருதசரின் அஜ்னாலா பகுதியைச் சேர்ந்த ஹர்பிரீத் சிங் (எ) ஹேப்பி பஸ்ஸியா (29), பஞ்சாபில் நிகழ்ந்த பல்வேறு பயங்கரவாத தாக்குதல்களில் தொடர்புடையதாக தேசிய புலனாய்வு முகமையால் (என்.ஐ.ஏ) தேடப்பட்டு வந்தார்.

பாகிஸ்தானின் புலனாய்வு அமைப்பான ஐ.எஸ்.ஐ மற்றும் பப்பர் கல்சா இன்டர்னேஷனல் (பி.கே.ஐ) என்ற காலிஸ்தான் பயங்கரவாத குழுவுடனும் இவருக்குத் தொடர்பு இருப்பதாக சந்தேகிக்கப்படுகிறது.

சண்டிகரில் உள்ள ஒரு வீட்டில் கடந்த ஆண்டு அக்டோபரில் கையெறி குண்டு வீசி தாக்குதல் நடத்தப்பட்ட வழக்கிலும் ஹர்பிரீத் சிங் தேடப்பட்டு வந்தார். இவரைக் கண்டுபிடித்துத் தருபவர்களுக்கு ரூ.5 லட்சம் பரிசுத்தொகையையும் என்.ஐ.ஏ கடந்த ஜனவரியில் அறிவித்திருந்தது.