தமிழக பட்ஜெட் இன்று தாக்கல்

முக்கிய அறிவிப்புகள் வெளியாக வாய்ப்பு

- 

சென்னை, மார்ச் 13: அடுத்த நிதியாண்டிற்கான (2025-26) தமிழக அரசின் நிதி நிலை அறிக்கை, சட்டப்பேரவையில் வெள்ளிக்கிழமை (மார்ச் 14) தாக்கல் செய்யப்பட உள்ளது. நிதியமைச்சர் தங்கம் தென்னரசு நிதிநிலை அறிக்கையை தாக்கல் செய்யவுள்ளார்.

நிதிநிலை அறிக்கை தாக்கலுக்காக பேரவை வெள்ளிக்கிழமை காலை 9.30 மணிக்கு கூடுகிறது. நிதிநிலை அறிக்கை தாக்கல் செய்யப்பட்ட பிறகு, பேரவை கூட்டத் தொடரின் நாள்களை இறுதி செய்வதற்காக அலுவல் ஆய்வு குழு கூட்டம் நடைபெறவுள்ளது. பேரவைத் தலைவர் மு.அப்பாவு தலைமையில் நடக்கும் இந்தக் கூட்டத்தில், கூட்டத் தொடரின் நாள்கள் இறுதி செய்யப்படும். ஏப்ரல் இரண்டாவது வாரம் வரை கூட்டத் தொடர் நடைபெற வாய்ப்புகள் இருப்பதாகத் தெரிகிறது.

முக்கிய அறிவிப்புகள்: நிதிநிலை அறிக்கையில் பல முக்கிய அறிவிப்புகள் வெளியாகும் என எதிர்பார்க்கப்படுகிறது. அடுத்த ஆண்டு சட்டப்பேரவைத் தேர்தலை தமிழ்நாடு எதிர்கொள்ளவுள்ள நிலையில், அதற்கு முன்பாக திமுக தலைமையிலான அரசு தாக்கல் செய்யும் முழுமையான நிதிநிலை அறிக்கை இதுவாகும்.