டெட் தேர்வு விவகாரத்தில் சீராய்வு மனு தாக்கல் செய்யப்படும்: அமைச்சர் அன்பில் மகேஸ்

இடைநிலை, பட்டதாரி ஆசிரியர்களுக்கு ஆசிரியர் தகுதித் தேர்வு கட்டாயம் என்ற உச்சநீதிமன்றத் தீர்ப்பை எதிர்த்து தமிழக அரசு சார்பில் சீராய்வு மனு தாக்கல் செய்யப்படும் என பள்ளிக் கல்வித் துறை அமைச்சர் அன்பில் மகேஸ் பொய்யாமொழி தெரிவித்தார்.

- 

சென்னை, செப். 11:

இடைநிலை, பட்டதாரி ஆசிரியர்கள் அனைவரும் ஆசிரியர் தகுதித் தேர்வில் இரண்டு ஆண்டுகளுக்குள் தேர்ச்சி பெற வேண்டும். தேர்வு எழுத விருப்பம் இல்லாதவர்கள் விருப்ப ஓய்வுக்கு விண்ணப்பிக்கலாம். அதேவேளை ஓய்வு பெற 5 ஆண்டுகள் உள்ளவர்களுக்கு விதிவிலக்கு அளிக்கப்படுகிறது என உச்சநீதிமன்றம் கடந்த செப். 1-ஆம் தேதி தீர்ப்பளித்தது. தமிழகத்தில் மட்டும் 1.75 லட்சம் ஆசிரியர்கள் பாதிக்கப்படும் சூழல் உருவாகியுள்ளது.

இதைத் தொடர்ந்து, தலைமைச் செயலர் நா.முருகானந்தம், அமைச்சர் அன்பில் மகேஸ் பொய்யாமொழி ஆகியோர் தலைமையில் நடைபெற்ற ஆலோசனைக் கூட்டங்களில் பணியில் உள்ள ஆசிரியர்களுக்கும் சிறப்பு ஆசிரியர் தகுதித் தேர்வு நடத்தி அவர்களின் பணிப் பாதுகாப்பை உறுதி செய்யலாம் எனவும், பணியாற்றிய அனுபவம் கருதி தேர்ச்சி பெறுவதற்கான மதிப்பெண்களை குறைத்து நிர்ணயிக்கலாம் என பெரும்பாலானோர் கருத்து தெரிவித்தனர்.

மேலும், தீர்ப்பை எதிர்த்து சீராய்வு மனு தாக்கல் செய்ய வேண்டும் என சில ஆசிரியர் சங்கங்கள் தெரிவித்தன. இதனால் இந்த விவகாரத்தில் முடிவு எட்டப்படாமல் இருந்தது.