திமுக ஆட்சியில் நிம்மதி இழந்த மக்கள்

திமுக ஆட்சியில் மக்கள் நிம்மதி இழந்து தவிப்பதாக குற்றம்சாட்டினார் அதிமுக பொதுச் செயலர் எடப்பாடி கே.பழனிசாமி.

- 

தென்காசி/அம்பை, ஆக. 5:

‘மக்களைக் காப்போம், தமிழகத்தை மீட்போம்’ என்ற பிரசார பயணம் மேற்கொண்டுள்ள அவர், தென்காசி மேலமாசி வீதி எம்ஜிஆர் திடலில் செவ்வாய்க்கிழமை பேசியதாவது:

தென்காசி நகரமே மக்கள் வெள்ளமாக காட்சியளிக்கிறது. விளையும் பயிர் முளையிலேயே தெரியும் என்பார்கள். இதுபோல இங்கு காணக்கூடிய மக்கள் கூட்டம், உங்களின் ஆரவாரம், மகிழ்ச்சி அதிமுகவின் வெற்றிக்கு மிகப்பெரிய அறிகுறியாக தெரிகிறது.

இந்தப் பகுதியைப் பொருத்த வரை வேளாண்மை நிறைந்த பகுதி. விவசாயத்தை நம்பிதான் இப்பகுதி மக்கள் வாழ்ந்து கொண்டிருக்கிறார்கள். அதிமுக ஆட்சிக்கு வரும் போதெல்லாம் வேளாண்மைக்கு முன்னுரிமை கொடுத்து பல்வேறு திட்டங்களை நிறைவேற்றியது.

இயற்கைச் சீற்றங்கள், பேரிடர்கள், கனமழை போன்றவற்றால் விளைபயிர்கள் சேதமடைந்த போது பயிர்க்காப்பீடு இழப்பீடு தொகை வழங்க ஏற்பாடு செய்யப்பட்டது.

வறட்சி நிவாரணம், கொள்முதல் நெல்லுக்கு உடனடி பணப்பட்டுவாடா என விவசாயிகள் நலனை பேணியது அதிமுக அரசு தான்.