குஜராத்தின் ரஷிய எண்ணெய் சுத்திகரிப்பு நிறுவனம் மீது பொருளாதாரத் தடை

ஐரோப்பிய யூனியன் நடவடிக்கை

- 

புது தில்லி, ஜூலை 18: ரஷியாவின் மிகப் பெரிய எரிசக்தி நிறுவனமான 'ரோஸ்நெஃப்ட்' நிறுவனத்துக்குச் சொந்தமான குஜராத்தில் உள்ள எண்ணெய் சுத்திகரிப்பு நிறுவனத்தின் மீது பொருளாதாரத் தடையை ஐரோப்பிய ஒன்றியம் வெள்ளிக்கிழமை விதித்தது.

மேலும், கச்சா எண்ணெய்க்கான விலை உச்ச வரம்பையும் ஐரோப்பிய யூனியன் குறைத்தது.

உக்ரைன் மீது ரஷியா போரை தீவிரமாக தொடர்ந்துவரும் நிலையில், அதற்குப் பதிலடி கொடுக்கும் வகையில் அமெரிக்கா, ஐரோப்பிய யூனியன் உள்ளிட்ட நாடுகள் ரஷியா மீது பல்வேறு வகைகளில் பொருளாதார தடைகளை விதித்து வருகின்றன.

தற்போது ரஷியாவின் கச்சா எண்ணெய் வர்த்தகத்துக்கு தடை ஏற்படுத்தும் வகையில், ரோஸ்நெஃப்ட் நிறுவனம் மீது புதிய பொருளாதார தடையை ஐரோப்பிய யூனியன் விதித்துள்ளது.

மேற்கத்திய நாடுகள் பொருளாதாரத் தடைகளை விதித்ததைத் தொடர்ந்து, ரஷியாவிடமிருந்து கச்சா எண்ணெய் வாங்கிய பல நாடுகள், இறக்குமதியை நிறுத்தின.