வானம் வசப்படும் வேளை

இந்தியாவின் விண்வெளி வீரர் சுபான்ஷு சுக்லா உள்ளிட்ட நான்கு பேர் கொண்ட குழு நேற்று மாலை சர்வதேச விண்வெளி நிலையத்தை அடைந்து புதியதொரு வரலாறு படைத்திருக்கிறது.

- 

'ஆக்ஸியம்-4' திட்டத்தின் கீழ் 'டிராகன்' விண்கலம் மூலம் சர்வதேச விண்வெளி மையத்துக்கான பயணத்தை நோக்கிய அந்தக் குழுவின் முதல் வெற்றி இது.

'ஸ்பேஸ்எக்ஸ்' நிறுவனத்தின் 'ஃபால்கன் 9' ராக்கெட் மூலம் 'டிராகன்' விண்கலம் பல தடைகளையும் சோதனைகளையும் கடந்து இலக்கை எட்டியிருக்கிறது. கடந்த மே மாதம் திட்டமிடப்பட்ட இந்த முயற்சி விண்கலப் பாதையில் நிலவிய மோசமான வானிலை, தொழில்நுட்பக் கோளாறு, விண்கலத்தை ஏவுதலில் சிக்கல் உள்ளிட்ட பிரச்னைகளால் ஆறு முறை ஒத்திவைக்கப்பட்டது.

இப்போது முதல்கட்டம் வெற்றிகரமாக முடிந்து அடுத்தகட்டத்துக்குச் செல்ல இருக்கிறார்கள் விண்வெளி வீரர்கள்.

சுமார் 60 பல்வேறு சோதனைகளை விண்வெளியில் மேற்கொண்டு பிறகு இரண்டு வாரங்களுக்குப் பிறகு பூமிக்குத் திரும்ப இருக்கிறார்கள். விண்வெளிப் பயணத்தைத் தொடங்கியபோது 'ஜெய்ஹிந்த்', 'ஜெய் பாரத்' என்று இந்திய வீரர் சுபான்ஷு சுக்லா முழங்கியது பழைய நினைவுகளைக் கிளறியது.

1984-இல் அன்றைய சோவியத் யூனியனின் 'சோயுஸ்' விண்கலத்தில் முதன்முறையாக விண்வெளிப் பயணத்தை மேற்கொண்ட முதலாவது இந்தியர் ராகேஷ் சர்மா. விண்வெளியில் இருந்து பூமிப் பந்தைப் பார்த்த அவரிடம் அன்றைய பிரதமர் இந்திரா காந்தி, 'அங்கிருந்து பார்க்கும்போது நமது இந்தியா எப்படி இருக்கிறது?' என்று கேட்டார். 'ஸாரா ஜஹான் ஸே அச்சா' (உலக நாடுகளில் எல்லாம் அழகானது) என்று அவர் தெரிவித்ததை இப்போது நினைத்துப் பார்க்கத் தோன்றுகிறது.