முருக பக்தர்கள் மாநாடு: வாகனப் போக்குவரத்து மாற்றம்

மதுரையில் ஞாயிற்றுக்கிழமை (ஜூன் 22) நடைபெறும் முருக பக்தர்கள் மாநாட்டை முன்னிட்டு உள்ளூர், வெளியூர்களிலிருந்து வரும் வாகனங்களுக்கு வழித்தடம் அறிவிக்கப்பட்டது.

- 

மதுரை, ஜூன் 21:

இதுகுறித்து மதுரை மாநகரக் காவல் ஆணையரக அலுவலகம் வெளியிட்ட செய்திக் குறிப்பு: மதுரை வண்டியூர் அருகே உள்ள அம்மா திடலில் முருக பக்தர்கள் மாநாடு ஞாயிற்றுக்கிழமை நடைபெற உள்ளது. இதை யடுத்து, மாநாட்டுக்கு வரும் பொதுமக்கள், முருக பக்தர்களின் வசதிக்காக போக்குவரத்து மாற்றங்கள் செய்யப்பட்டுள்ளன.

பேருந்துகள் செல்ல வேண்டிய வழித்தடம்: ராமநாதபுரம், தூத்துக்குடி, தென்காசி, திருநெல்வேலி, கன்னியாகுமரி ஆகிய தென் மாவட்டங்களுக்கு மதுரை மாட்டுத்தாவணி பேருந்து நிலையத்திலிருந்து செல்லும் அனைத்துப் பேருந்துகளும் மீனாட்சி மிஷன் மருத்துவமனை சந்திப்பு, பாண்டிகோவில் சந்திப்பு, பி.சி. பெருங்காயம் சந்திப்பு, கருப்பாயூரணி, ஒத்த வீடு, ஆண்டார்கொட்டாரம், சக்கிமங்கலம், சிலைமான் வழியாக விரகனூர் சுற்றுச் சாலை சந்திப்பு சென்று, தொடர்ந்து மண்டேலா நகர் சந்திப்பு வழியாக செல்லலாம்.

இதே போன்று, கன்னியாகுமரி, தென்காசி, திருநெல்வேலி, தூத்துக்குடி, ராமநாதபுரம் ஆகிய தென் மாவட்டங்களிலிருந்து மதுரைக்கு வரும் பேருந்துகள் அனைத்தும் விரகனூர் சந்திப்பிலிருந்து மாற்றுப் பாதையாக புதிய தென்கரை சாலை, குருவிக்காரன் சாலை பாலம் சந்திப்பு, அரவிந்த் கண் மருத்துவமனை சந்திப்பு, ஆவின் சந்திப்பு, கே.கே. நகர் சந்திப்பு, தினசரி காய்கறிச் சந்தை சந்திப்பு வழியாக மாட்டுத் தாவணி பேருந்து நிலையத்துக்கு செல்லலாம்.

சரக்கு வாகனங்களுக்கான போக்குவரத்து வழித்தடம்: மேலூர் சாலையிலிருந்து வரும் அனைத்து சரக்கு வாகனங்களும் மேலூர் நான்கு வழிச்சாலை சந்திப்பிலிருந்து பூவந்தி, திருப்புவனம் வழியாக விரகனூர் சந்திப்பை அடைந்து சிந்தாமணி சாலை சந்திப்பு, மண்டேலா நகர் சந்திப்பு வழியாக தென்காசி, திருநெல்வேலி, கன்னியாகுமரி, தூத்துக்குடி ஆகிய மாவட்டங்களுக்கு செல்ல வேண்டும்.