உயர் சிறப்பு மருத்துவப் படிப்பில் அரசு மருத்துவர்களுக்கான ஒதுக்கீட்டை மத்திய அரசு உறுதி செய்ய வலியுறுத்தல்

உயர் சிறப்பு மருத்துவப் படிப்புகளில் தமிழக அரசு மருத்துவர்களுக்கான 50 சதவீத ஒதுக்கீடு முழுமையாக கிடைப்பதை மத்திய அரசு உறுதி செய்ய வேண்டும் என்று மக்கள் நல்வாழ்வுத் துறை அமைச்சர் மா.சுப்பிரமணியன் வலியுறுத்தியுள்ளார்.

- 

சென்னை, ஜூன் 11:

இதுதொடர்பாக மத்திய சுகாதாரத் துறை அமைச்சர் ஜெ.பி. நட்டாவுக்கு அவர் எழுதிய கடிதம்:

மாநில ஒதுக்கீட்டின் கீழ் உள்ள தமிழக உயர் சிறப்பு முதுநிலை மருத்துவ இடங்கள் குறித்த ஒரு முக்கியமான பிரச்சினையை உங்களது அவசர கவனத்துக்குக் கொண்டு வர விரும்புகிறேன். உச்சநீதிமன்றத் தீர்ப்பின்படி, தமிழகத்தில் உள்ள அரசு மருத்துவக் கல்லூரிகளில், உயர் சிறப்பு முதுநிலை மருத்துவப் படிப்புகளில் 50 சதவீத இடங்கள் தமிழகத்தில் அரசுப் பணியில் உள்ள மருத்துவர்களுக்கு மட்டுமே ஒதுக்கீடு செய்யப்பட்டு வருகிறது.