50 சுகாதார நிலையங்கள், 208 நலவாழ்வு மையங்கள் ஒரு மாதத்துக்குள் தொடங்கத் திட்டம்

தமிழகம் முழுவதும் 208 நகர்ப்புற நலவாழ்வு மையங்கள் மற்றும் 50 ஆரம்ப சுகாதார நிலையங்கள் அடுத்த ஒரு மாதத்துக்குள் தொடங்கப்படும் என்று மக்கள் நல்வாழ்வுத் துறை அமைச்சர் மா.சுப்பிரமணியன் தெரிவித்தார்.

- 

சென்னை, ஏப். 21:

பேரவையில் திங்கள்கிழமை நடைபெற்ற மருத்துவம் - மக்கள் நல்வாழ்வுத் துறை மானியக் கோரிக்கை மீதான விவாதத்துக்கு அமைச்சர் மா.சுப்பிரமணியன் அளித்த பதிலுரை:

தமிழகத்தில் கடந்த நான்கு ஆண்டுகளில் மருத்துவத் துறையில் அளப்பரிய பல நடவடிக்கைகள் முன்னெடுக்கப்பட்டுள்ளன. உலக சுகாதார அமைப்பின் தரவின்படி 1,000 நோயாளிகளுக்கு அமெரிக்காவிலேயே 3.6 என்ற அளவில்தான் மருத்துவர்களின் சராசரி எண்ணிக்கை உள்ளது. தமிழகத்தில் அந்த எண்ணிக்கை 4-ஆக இருக்கிறது.