வக்ஃப் மசோதா: மக்களவையில் நிறைவேற்றம்

'வக்ஃப் சட்டத் திருத்த மசோதா-2025' எதிர்க்கட்சிகளின் கடும் எதிர்ப்புக்கு இடையே மக்களவையில் புதன்கிழமை நள்ளிரவு நிறைவேறியது.

- 

புது தில்லி, ஏப். 2: இந்த மசோதாவுக்கு ஆதரவாக 288 உறுப்பினர்களும், எதிராக 232 உறுப்பினர்களும் வாக்களித்தனர்.

முன்னதாக, இந்த மசோதா மீது நடைபெற்ற விவாதத்தில், ஆளும் தரப்பும் எதிர்க்கட்சிகளும் கருத்து மோதலில் ஈடுபட்டதால் விவாதத்தில் அனல் பறந்தது.

நாடு முழுவதும் வக்ஃப் சொத்துகளை ஒழுங்குபடுத்துதல், நிர்வாகத்தில் உள்ள சிக்கல்களுக்கு தீர்வு காணும் நோக்கில், கடந்த 1995-ஆம் ஆண்டின் வக்ஃப் சட்டத்தில் திருத்தங்கள் மேற்கொள்ளும் மசோதா, முஸ்லிம் வக்ஃப் (ரத்து) மசோதா-2024 ஆகிய இரண்டையும் மத்திய சிறுபான்மையினர் விவகாரங்கள் துறை அமைச்சர் கிரண் ரிஜிஜு மக்களவையில் புதன்கிழமை காலை தாக்கல் செய்தார்.

இந்த மசோதா மீதான விவாதத்தை தொடங்கிவைத்து பேசிய மக்களவை காங்கிரஸ்குழு துணைத்தலைவர் கௌரவ் கோகோய், அரசமைப்புச் சட்டத்தின் மீதான தாக்குதல் வக்ஃப் மசோதா என்றும், இந்த மசோதாவை 'இண்டி' கூட்டணி எதிர்க்கிறது என்றும் தெரிவித்தார்.

இதைத் தொடர்ந்து, திமுக எம்.பி. ஆ.ராசா, விடுதலைச் சிறுத்தைகள் கட்சித் தலைவர் திருமாவளவன் உள்ளிட்டோர் மசோதாவுக்கு எதிர்ப்பு தெரிவித்துப் பேசினர்.