உக்ரைனுக்கு ராணுவ உதவிகள் நிறுத்திவைப்பு

அமெரிக்க அதிபர் டிரம்ப் உத்தரவு

- 

நியூயார்க், மார்ச் 4: உக்ரைனுக்கு அளித்துவந்த அனைத்து வகையான ராணுவ உதவிகளையும் நிறுத்திவைப்பதாக அமெரிக்க அதிபர் டொனால்ட் டிரம்ப் அதிரடியாக அறிவித்துள்ளார்.

இந்த உத்தரவை உடனடியாக அமல்படுத்தவும் அவர் உத்தரவிட்டுள்ளார். அதே நேரம், உக்ரைன் மீதான போர் காரணமாக ரஷியா மீது விதிக்கப்பட்ட பொருளாதாரத் தடைகளில் சிலவற்றை நீக்குவது குறித்து அதிபர் டிரம்ப் நிர்வாகம் ஆலோசித்து வருவதாகவும் தகவல்கள் வெளியாகியுள்ளன.

உக்ரைன் போருக்கு அமெரிக்கா செய்த உதவிகளுக்கு கைம்மாறாக, உக்ரைனின் கனிம வளங்களை அமெரிக்காவுக்கு அளிக்கும் ஒப்பந்தத்தில் கையொப்பமிடுவதற்காக உக்ரைன் அதிபர் வெலோதிமீர் ஸெலென்ஸ்கி கடந்த சில நாட்களுக்கு முன்பு அமெரிக்காவுக்கு வந்தார்.

வெள்ளை மாளிகையின் ஓவல் அலுவலகத்தில் அதிபர் டிரம்ப், துணை அதிபர் ஜே.டி. வான்ஸ் ஆகியோரை ஸெலென்ஸ்கி சந்தித்தார். அந்தச் சந்திப்பு காரசாரமான விவாதமாக மாறியது. ஸெலென்ஸ்கிக்கு போரை நிறுத்த விருப்பம் இல்லை எனவும், மூன்றாம் உலகப் போரை உருவாக்க முயற்சிப்பதாகவும் டிரம்ப் நேரடியாகக் கண்டித்தார். இதையடுத்து, அமெரிக்காவுடன் கனிமவள ஒப்பந்தத்தில் கையொப்பமிடாமல் ஸெலென்ஸ்கி நாடு திரும்பினார்.