சமூக ஒற்றுமையின் விதைகள்!

இன்றைக்கு நகர்ப்புறங்களுக்குப் பல்வேறு காரணங்களால் மக்கள் இடம் பெயர்ந்து வருகின்றனர்.

- நசீர் அதாவுல்லாஹ்

2050-ஆம் ஆண்டுக்குள் நம்நாட்டில் 52.8 சதவீத மக்கள் நகர்ப்புற வாழ்க்கைக்குத் தள்ளப்படுவார்கள் என்று கணிக்கப்பட்டுள்ளது. 'அருகில் இருப்பவர் அயலான்-நெஞ்சில் இருப்பவர் உறவினர்' என்பார்கள். இன்றைக்கும் கிராமங்களில் அண்டை வீட்டார் உறவு ஆரோக்கியமாக உள்ளது. ஆனால், நகர்ப்புறங்களில் பாலமாக இருக்க வேண்டிய இந்த உறவுமுறை எல்லைகளாக மாறி விட்டது.காலையில் சென்று இரவில் திரும்பும் இயந்திர வாழ்க்கை அண்டை வீட்டாருடன் ஒரு நிமிஷம் பேசுவதற்கான நேரத்தைக்கூட நமக்குத் தருவதில்லை. நாம் சிறந்த மனிதர்கள் என்பதற்கு மனைவி, அண்டை வீட்டினர், நண்பர்கள் ஆகிய மூன்று தரப்பினரின் நற்சான்றிதழ் அவசியம். இவர்கள்தான் நம்மோடு அருகில் இருப்பவர்கள். பரபரப்பான வாழ்வின் ஓட்டத்தில் இந்தச் சான்றிதழைப் பெறுவது கடினமாகி விட்டது என்றாலும், நெருக்கடியான சூழ்நிலைகளில் நமக்கு உடனடி உதவியும், ஆறுதலும் தருவதில் இவர்கள்தான் முதன்மையானவர்கள்.

மன அமைதிக்கும், மகிழ்ச்சிக்கும், குறிப்பாக இளம் தலைமுறையினர் மன அழுத்தத்தில் இருந்து விடுபட்டு ஆரோக்கியமான அமைதியான வாழ்க்கைக்கு அண்டை அயலாருடன் நல்லுறவைப் பேணி வருவது மிக அவசியம்.