மொழிகள் கற்றால் மகுடம் நிச்சயம்!

நமது அன்றாட வாழ்வில் பல தகவல்களை மற்றவர்களுடன் பரிமாறிக் கொள்ள ஒரு மொழி தேவைப்படுகிறது. மொழி ஒருவரின் எண்ணங்களைச் செம்மைப்படுத்துகிறது.

- முனைவர் என்.பத்ரி

பல எதிர்பாராத நல்வாய்ப்புகளை நம் வாழ்வில் கொண்டு வந்து சேர்க்கிறது.

ஒருவரின் பன்மொழிப் புலமையை அவரின் தனித்துவ திறனாக சமுதாயம் கருதுகிறது. பல மொழிகளை அறிந்திருப்பது, அதிக துறைகளில் வேலைவாய்ப்புகளை மாணவர்களுக்கு அள்ளித் தருகிறது. குறிப்பாக, வேலை தேடுவோருக்கு அயல் நாட்டு மொழிகளில் புலமை, சர்வதேச நிறுவனங்களில் வேலைவாய்ப்புகளைப் பெற உதவும்.

பிற மொழிப் பேச்சாளர்கள் பொது நிகழ்வுகளில் பேசும்போது, பேச்சாளர் பேசும் மொழியை அறிந்த ஒருவர் மொழி பெயர்ப்பாளராக விளங்கி, அவர் சொல்லும் கருத்துகளைக் கேட்பவர்களுக்கு விளக்குகிறார். எனவே, மக்களை இணைக்கும் பாலமாக மொழிகள் உள்ளன.

மகாகவி பாரதி 18 மொழிகளை அறிந்திருந்தார். அவர் அறிந்திருந்த திராவிட, ஆரிய, ஐரோப்பிய மொழிகள் அவருடைய படைப்புகளுக்கு மெருகூட்டின.

மொழிகளைப் பேசுவதிலும், எழுதுவதிலும் திறமையானவர்கள் எல்லாப் பணிகளிலும் சிறந்து விளங்குகிறார்கள். இது தெரிந்தும் நம் கல்வி அமைப்பு, மொழிகளுக்கான முறையான அங்கீகாரத்தை வழங்குவதில்லை.

ஒரு மொழியை முறையாகக் கற்றுத் தேர்ச்சிபெற்று, தவறில்லாமல் அதைப் பயன்படுத்துவது என்பது ஒரு கலை ஆகும். நல்ல வேலைவாய்ப்புப் பெற மொழிப்பாடப் பட்டங்கள் மாணவர்களுக்கு பெரிதும் உதவுகின்றன. தமிழ், ஆங்கிலம், ஹிந்தி, அரபு, பிரெஞ்சு போன்ற மொழிகளை அறிந்தவர்கள் பெரும்பாலும் வேலை வாய்ப்பின்றி இருப்பதில்லை.

நமது தாய்மொழி தமிழை நாம் பயில்வது அவசியம். ஆனால், பள்ளிகளில் ஆங்கிலவழி படிப்புக்கு இருக்கும் மோகம், தமிழ் மொழிவழி படிப்புக்கு இல்லாதது துரதிருஷ்டவசமானது.