மாநிலங்களவையில் வக்ஃப் மசோதா தாக்கல்

சர்ச்சைக்குரிய வக்ஃப் சட்டத் திருத்த மசோதா, மாநிலங்களவையில் வியாழக்கிழமை தாக்கல் செய்யப்பட்டது.

- 

புது தில்லி, ஏப். 3:

இந்த மசோதா முஸ்லிம்களின் உரிமைகளைப் பறிப்பதாக எதிர்க்கட்சிகள் சுமத்திய குற்றச்சாட்டை நிராகரித்த மத்திய அரசு, 'முஸ்லிம் பெண்களுக்கு அதிகாரமளிப்பதுடன், அனைத்துத் தரப்பு முஸ்லிம்களின் உரிமைகளைக் காக்கும் மசோதா' என்று விளக்கமளித்துள்ளது.

நாட்டில் சமூக-மத ரீதியிலான பணிகளுக்கு நன்கொடையாக அளிக்கப்படும் வக்ஃப் சொத்துகளின் நிர்வாகத்தில் வெளிப்படைத்தன்மையை உறுதி செய்யும் நோக்கிலான வக்ஃப் சட்டத் திருத்த மசோதா, மக்களவையில் புதன்கிழமை தாக்கல் செய்யப்பட்டு, சுமார் 12 மணி நேர விவாதத்துக்கு பிறகு நள்ளிரவில் நிறைவேற்றப்பட்டது. மசோதாவுக்கு ஆதரவாக 288 வாக்குகளும், எதிராக 232 வாக்குகளும் பதிவாகின.

இந்நிலையில், மாநிலங்களவையில் விவாதம்-நிறைவேற்றத்துக்காக மசோதாவை வியாழக்கிழமை தாக்கல் செய்து, மத்திய சிறுபான்மையினர் விவகாரங்கள் துறை அமைச்சர் கிரண் ரிஜிஜு பேசியதாவது:

வக்ஃப் சொத்துகளின் நிர்வாகத்தில் வெளிப்படைத்தன்மை, பொறுப்புடைமை, செயல்திறன் ஆகிய மூன்று தூண்களையும் நிலைநாட்டுவதே மசோதாவின் நோக்கம். இது, மத விவகாரங்களில் எந்த வகையிலும் தலையிடாது.