‘நெடுந்தொடர்’ பரிதாபங்கள்!

உண்மையில் நெடுந்தொடரில் வில்லத்தனம் புரியும் சின்னத்திரை நடிகர், நடிகைகளும் அதன் பார்வையாளர்களுமாக எதிரெதிரே அமர்ந்து விவாதிக்கும் ஒரு தொலைக்காட்சி நிகழ்ச்சியைக் காண நேர்ந்தது. நிகழ்ச்சியின் கருப்பொருள் சாதாரணமானதாக இருந்தாலும் எளிய மக்களின் வார்த்தைகள் அந்த நிகழ்ச்சிக்கு மிகவும் வலிமையாக இருந்தன. ஒரு கட்டத்தில் தாம் பார்க்கும் நெடுந்தொடர் வில்லிகளைப் பார்த்து எதிரே இருந்த பார்வையாளர்கள் ஆவேசமாகக் கேள்வி கேட்டுக் கொண்டே இருந்தார்கள்.

- முனைவர் பவித்ரா நந்தகுமார்

தொடரில் வரும் ஒரு கதாபாத்திரத்தைக் குறிப்பிட்டு, 'உங்கள் வில்லத்தனத்துக்கு ஓர் அளவே இல்லையா? ஏன் இப்படி கொடுமைப்படுத்துகிறீர்கள்? உங்களுக்கெல்லாம் மனசாட்சி இருக்கிறதா' போன்ற கேள்விக் கணைகளைத் தொடுத்து தாங்களும் கொந்தளித்தார்கள். இதைப் பார்க்க பார்க்க வேடிக்கையாக இருந்தது.

வில்லன் கதாபாத்திரத்தை ஏற்று நடித்தவர்கள், 'இந்தக் கேள்விகளை இயக்குநரிடம் கேட்காமல் என்னிடம் ஏன் கேட்கிறீர்கள்' என நேரடியாக சொல்லாமல் அந்த கதாபாத்திரத்தின் தன்மைக்கேற்ப எதை எதையோ சொல்லி சமாளித்தார்கள். முன்பு திரைப்படங்கள் எப்படி தயாரிக்கப்படுகின்றன என்பதை அறியாத மக்கள் அதை உண்மை என்றே கருதி அதில் வரும் வில்லன்-வில்லிகளை திரையரங்கைவிட்டு வெளியே வந்ததும், மண்ணை வாரி தூற்றிச் சபிப்பார்கள். அன்று இருந்த தலைமுறையினர் இன்னும் மிச்சம் இருக்கிறார்களோ என்று எண்ணும் வகையில் இருந்தது அவர்களது செயல்கள்.

ஒரு திரைப்படத்தைப் பார்த்தால்கூட அதன் கதையம்சத்தையும் கதாபாத்திரங்களையும் பற்றி சில நாள்கள் பேசி விட்டு வேறு வேலையைப் பார்க்கச் சென்று விடுவோம். ஆனால், இந்த நெடுந்தொடர்கள் தினமும் நம் வீட்டுக்குள் வந்து கதவைத் தட்டுகின்றன. இப்படி ஒன்றல்ல இரண்டல்ல, ஓர் அலைவரிசை சேவையில் குறைந்தபட்சம் ஒரு நாளைக்கு பத்து நெடுந்தொடர்களை ஒளிபரப்புகிறார்கள். அதை நாள் முழுவதும் அமர்ந்து பார்க்கும் மனநிலையை நினைத்தால் அச்சமாக இருக்கிறது.

பல வீடுகளில் பெண்மணிகள் வீட்டு வேலைகள் முடிந்ததும் முற்பகல் 11 மணிக்குத் தொடங்கி இடைவெளியே இல்லாமல் பிற்பகல் 3 மணி வரை பார்க்கின்றனர். பின்னர், மாலை 6 மணிக்குத் தொடங்கி இரவு 11 மணி வரை நெடுந்தொடர்களைக் கண்டு துக்கப்படுகின்றனர். இதில் இன்னும் சில வகை பெண்கள் இடையிடையே ஒளிபரப்பப்படும் விளம்பர இடைவேளைகளைக் கூட விடுவதில்லை. அந்த நேரத்தில் வேறு வேறு அலைவரிசைகளை மாற்றி மாற்றி இன்னும் இரண்டு நெடுந்தொடர்களைக் கூடுதலாக கண்ணுற்று சாமர்த்தியமாக நேரத்தை மிச்சம் பிடிக்கின்றனர்.