இந்தியா-ரஷியா 5 ஆண்டு பொருளாதார திட்டம்

பல்துறை ஒத்துழைப்பை அதிகரிக்க முடிவு

- 

இந்தியா - ரஷியா இடையேயான பொருளாதார, வர்த்தக உறவை மேலும் விரிவுபடுத்தும் வகையில் 5 ஆண்டு பொருளாதாரத் திட்டத்தை தில்லியில் நடைபெற்ற ஆண்டு உச்சி மாநாட்டில் இரு நாடுகளும் உறுதி செய்துள்ளன.

உக்ரைன் மீது போர் நடத்தி வரும் ரஷியாவிடமிருந்து மலிவு விலையில் அதிக கச்சா எண்ணெய் வாங்குவதால் இந்திய இறக்குமதி பொருள்கள் மீது கூடுதலாக 25 சதவீத வரியுடன் மொத்தம் 50 சதவீத வரி விதிப்பு உள்ளிட்ட நடவடிக்கைகளை அமெரிக்கா மேற்கொண்டு வரும் நிலையில், இரு நாடுகளிடையேயான இந்த 5 ஆண்டு பொருளாதாரத் திட்டம் முக்கியத்துவம் பெற்றுள்ளது.

ஆண்டு மாநாட்டில், 2030-ஆம் ஆண்டு வரையிலான 5 ஆண்டு பொருளாதார திட்டத்தை இரு நாடுகளும் இறுதி செய்ததோடு, சுகாதாரம், போக்குவரத்து, மக்கள் பரிமாற்றம் என பல்வேறு துறைகளில் ஒத்துழைப்பை மேலும் விரிவுபடுத்தும் வகையில் பல்வேறு ஒப்பந்தங்களும் கையொப்பமாகியுள்ளன.

தில்லியில் உள்ள ஹைதராபாத் இல்ல அரங்கில் வெள்ளிக்கிழமை நடைபெற்ற இந்தியா-ரஷியா 23-ஆவது ஆண்டு மாநாட்டில் பிரதமர் மோடி - ரஷிய அதிபர் புதின் தலைமையில் இரு நாட்டு பிரதிநிதிகள் பங்கேற்று விரிவான பேச்சுவார்த்தை மேற்கொண்ட பிறகு, இரு தலைவர்கள் தரப்பில் கூட்டறிக்கை வெளியிடப்பட்டது. புரிந்துணர்வு ஒப்பந்தங்களும் மேற்கொள்ளப்பட்டன.

கூட்டறிக்கையில், இந்தியா-ரஷியா இடையே 80 ஆண்டுகளாக நீடித்து வரும் நட்புறவை இருதலைவர்களும் குறிப்பிட்டதோடு, அந்த நட்புறவை மேலும் வலுப்படுத்த உறுதி தெரிவித்தனர். இரு நாடுகளிடையேயான வர்த்தக உறவை மேலும் வலுப்படுத்தும் விதமாக, வரி மற்றும் வரியில்லா வர்த்தகத் தடைகளுக்கு தீர்வு காணவும், சரக்கு போக்குவரத்தில் உள்ள தடைகளை நீக்கவும் இருதரப்பில் உறுதியேற்கப்பட்டது.

எரிசக்தி, போக்குவரத்து, சிவில் அணுசக்தி ஒத்துழைப்பு, விண்வெளி துறை ஒத்துழைப்பு, அறிவியல் தொழில்நுட்பம், கலாசாரம் மற்றும் சுற்றுலா, பயங்கரவாத எதிர்ப்பு உள்ளிட்ட பல்வேறு துறைகளில் இருதரப்பு ஒத்துழைப்பை வலுப்படுத்த உறுதியேற்கப்பட்டதாகத் தெரிவிக்கப்பட்டது.

இந்தியாவில் ரஷிய ராணுவ வன்பொருள் தயாரிப்பு:

இந்திய ராணுவ பயன்பாட்டுக்கான ரஷிய ஆயுதங்கள் மற்றும் பாதுகாப்பு கருவிகளைப் பராமரிக்க, அந்நாட்டின் ராணுவ வன்பொருள் மற்றும் உதிரி பாகங்களை இந்தியாவில் தயாரிப்பதற்கு ரஷியா ஒப்புக் கொண்டுள்ளது.