விநாயகர் சதுர்த்தி விழா: கோயில்களில் சிறப்பு வழிபாடு

செங்கல்பட்டு, காஞ்சிபுரம், திருவள்ளூர் மாவட்டங்களில் விநாயகர் சதுர்த்தி விழா புதன்கிழமை சிறப்பாக கொண்டாடப்பட்டது.

- 

செங்கல்பட்டு/காஞ்சிபுரம்/திருவள்ளூர், ஆக.27:

செங்கல்பட்டு சக்தி விநாயகர் கோயிலில் விநாயகர் சதுர்த்தி விழாவையொட்டி சிறப்பு வழிபாடு நடைபெற்றது. இந்து சமய அறநிலையத் துறை கட்டுப்பாட்டில் உள்ள இக்கோயிலில் சிறப்பு அபிஷேகம், அலங்காரம், பூஜைகள் நடைபெற்றன. வள்ளி தெய்வானை சமேத கல்யாண சுப்பிரமணியருக்கும் நவக்கிரகங்களுக்கும் சிறப்பு அபிஷேகம், அலங்காரம், சிறப்பு வழிபாடுகள் நடைபெற்றன.

தொடர்ந்து அன்னதானம் வழங்கப்பட்டது. கோயில் செயல் அலுவலர் இர. சரஸ்வதி, ஆய்வாளர் பாஸ்கரன், நரசிம்மன் மற்றும் கோயில் பணியாளர்கள், குருக்கள் ஏற்பாடுகளை செய்திருந்தனர்.

காஞ்சிபுரத்தில்... விநாயகர் சதுர்த்தியையொட்டி காஞ்சிபுரம் காமட்சி அம்மன் கோயில் சந்நிதி தெரு ஏலேலசிங்க விநாயகர் கோயிலில் ரூ.15 லட்சம் ரூபாய் நோட்டுகளால் அலங்கரிக்கப்பட்டு சிறப்பு தீபாராதனைகள் நடைபெற்றன.

இக்கோயிலில் ஆண்டுதோறும் விநாயகர் சதுர்த்தி அன்று மட்டும் பக்தர்களிடம் ரூபாய் நோட்டுகளை சலவைத்தாள்களாகப் பெற்று விநாயகரை அலங்கரித்து சிறப்பு தீபாராதனைகள் நடைபெறுவது பல ஆண்டுகளாக வழக்கமாக இருந்து வருகிறது.

நிகழாண்டு விநாயகர் சதுர்த்தியையொட்டி ஏலேல சிங்க விநாயகருக்கு சிறப்பு அபிஷேகமும் அதனைத் தொடர்ந்து ரூ.15 லட்சம் ரூபாய் நோட்டுகளால் அலங்கரிக்கப்பட்டு சிறப்பு தீபாராதனைகள் நடைபெற்றன.

இதனைத் தொடர்ந்து பக்தர்களுக்கு அன்னதானமும் வழங்கப்பட்டது. ஏற்பாடுகளை ஆலய நிர்வாகக்குழுவின் தலைவர் குப்புசாமி, செயலாளர் ஜெகன்னாதன், பொருளாளர் சீனிவாசன் ஆகியோர் செய்திருந்தனர்.

காஞ்சிபுரம் கச்சபேசுவரர் கோயிலில் உள்ள பஞ்சசந்தி விநாயகருக்கு லட்சதீப பெருவிழா நடைபெற்றது.