பிரதமர், முதல்வர்கள் பதவிப் பறிப்பு மசோதா

கடும் எதிர்ப்புக்கு இடையே மக்களவையில் அறிமுகம்

- 

புது தில்லி, ஆக. 20: தீவிர குற்றப் புகாரில் கைது செய்யப்பட்டு 30 நாட்கள் காவலில் வைக்கப்படும் பிரதமர், மாநில முதல்வர்கள் மற்றும் அமைச்சர்களைப் பதவியிலிருந்து நீக்கம் செய்வதற்கான மூன்று சட்ட மசோதாக்கள் மக்களவையில் புதன்கிழமை அறிமுகம் செய்யப்பட்டன. எதிர்க்கட்சிகளின் கடும் எதிர்ப்புக்கு இடையே ‘யூனியன் பிரதேசங்கள் திருத்த மசோதா 2025, அரசியல் சட்டம் 130-ஆவது திருத்த மசோதா 2025, ஜம்மு-காஷ்மீர் மறுசீரமைப்பு திருத்த மசோதா 2025’ என்ற அந்த 3 மசோதாக்களை மத்திய உள்துறை அமைச்சர் அமித் ஷா அறிமுகம் செய்தார்.

பின்னர், உறுப்பினர்களின் குரல் வாக்கெடுப்பு மூலம் இந்த மசோதாக்கள் நாடாளுமன்ற கூட்டுக்குழு ஆய்வுக்குப் பரிந்துரை செய்யப்பட்டது. மக்களவையைச் சேர்ந்த 21 உறுப்பினர்கள் மற்றும் மாநிலங்களவையைச் சேர்ந்த 10 பேர் என மொத்தம் 31 உறுப்பினர்களைக் கொண்ட இந்த கூட்டுக் குழு, அடுத்த நாடாளுமன்ற கூட்டத்தொடரின் முதல் வாரத்தின் கடைசி நாளில் தனது அறிக்கையைச் சமர்ப்பிக்க பணிக்கப்பட்டுள்ளது.

வரும் நவம்பர் மாதம் மூன்றாவது வாரத்தில் நாடாளுமன்றத்தின் அடுத்த கூட்டத்தொடர் (குளிர்கால கூட்டத்தொடர்) தொடங்க வாய்ப்புள்ளதாகத் தெரிகிறது.