வெப்பமும் தாக்கமும்

வெப்ப அலை என்பது எப்போதோ நடக்கும் பாதிப்பாக அல்லாமல் அடிக்கடி நிகழ்வாகவே மாறி இந்தியாவின் சுகாதாரத்திற்கும் பொருளாதாரத்துக்கும் சவாலை உருவாக்கியுள்ளது.

- 

இந்தியா முழுவதும் பரவலாக வெப்ப அலை வீசிக்கொண்டிருக்கிறது. ஏப்ரல் மாதத்தின் முதல் வாரத்திலேயே வட இந்தியாவின் சில பகுதிகளில் 41 டிகிரி செல்ஷியஸை கடந்தது என்பது மட்டுமல்ல, இரவு எந்த ஆறுதலையும் வழங்கவில்லை.

1992 முதல் இதுவரை 26,000-க்கும் அதிகமான அதிகரித்த வெப்ப அலை தொடர்பான உயிரிழப்புகள் இந்தியாவில் பதிவாகியிருக்கின்றன. பாதிப்பின் எண்ணிக்கை ஆண்டுதோறும் அதிகரித்து வருகிறதே தவிர குறைந்தபாடில்லை. கடந்த ஆண்டில் மட்டும் அரசுத் தரவுகளின்படி வெப்ப அலை தொடர்பான மரணங்கள் 360. வெப்ப அலை அல்லாத அதிகரித்த வெப்பம் காரணமான மரணங்களையும் கணக்கிட்டால் எண்ணிக்கை சில மடங்கு அதிகரிக்கக்கூடும்.

2014 முதல் 2023 வரை வெப்பம் அதிகமாக காணப்படும் நாட்கள் ஆண்டுதோறும் அதிகரித்து வந்திருக்கின்றன. இதன் காரணமாக குழந்தைகள் 47%, முதியோர் 58% அதிகமாக பாதிப்புக்கு உள்ளாகிறார்கள் என்று ஆய்வு ஒன்று தெரிவிக்கிறது.

இந்திய வானிலை ஆய்வு மையம் இந்த ஆண்டு கோடையின் வெப்ப அலை நாள்களின் எண்ணிக்கை இரட்டிப்பாகக் கூடும் என்று கணித்திருக்கிறது. பல மாநிலங்களில் ஏற்கெனவே மஞ்சள் எச்சரிக்கை அறிவிக்கப்பட்டிருக்கிறது. 2024-இல் 77 வெப்ப அலை நிகழ்வுகள் இந்தியாவில் பதிவு செய்யப்பட்டதாகவும், வெப்பத்தின் தாக்குதலால் கடந்த ஆண்டு கோடையில் 700-க்கும் அதிகமானோர் உயிரிழந்ததாகவும் இன்னொரு ஆய்வு பதிவு செய்கிறது.