கச்சத்தீவு விவகாரம் முதல்வர்-எதிர்க்கட்சித் தலைவர் விவாதம்

கச்சத்தீவு விவகாரம் தொடர்பாக முதல்வர், அமைச்சர்களுடன் எதிர்க்கட்சித் தலைவர் எடப்பாடி கே.பழனிசாமி விவாதத்தில் ஈடுபட்டார்.

- 

சென்னை, ஏப். 2: கச்சத்தீவு மீட்பு, மீனவர்கள் பாதுகாப்பு தொடர்பாக பேரவையில் புதன்கிழமை கொண்டுவரப்பட்ட அரசின் தனித் தீர்மானத்தின் மீது நடந்த விவாதம்:

எதிர்க்கட்சித் தலைவர் எடப்பாடி கே.பழனிசாமி: கச்சத்தீவு விவகாரத்தில் கடந்த நான்கு ஆண்டு கால திமுக ஆட்சியில் என்ன நடவடிக்கைகள் எடுக்கப்பட்டன?. 2019-இல் திமுக அணிக்கு 38 எம்.பி.க்கள் இருந்தனர். 2024-இல் 39 எம்.பி.க்கள் உள்ளனர். எனவே, இந்தப் பிரச்னையை நாடாளுமன்றத்தில் எடுத்துச் சொன்னால்தான் தீர்வு கிடைக்கும்.

மீனவர்களைக் கைது செய்வது, அவர்களது படகுகள் பறிமுதல் செய்யப்படுவதுடன் சிறையில் இருந்து வெளியே வரமுடியாத நிலை உள்ளது.

கச்சத்தீவை இலங்கைக்கு தாரை வார்த்ததால், நமது மீனவர்கள் இலங்கைக் கடற்படையினரால் அடிக்கடி துன்புறுத்தலுக்கு உள்ளாக்கப்படுகின்றனர். கைது செய்யப்படுவதுடன், அதிக அளவு அபராதமும் விதிக்கப்படுவதால் பாதிக்கப்படும் மீனவர்களை விடுவிக்க இலங்கையுடன் மத்திய அரசு பேசி நிரந்தரத் தீர்வை ஏற்படுத்த வேண்டும். எங்களுடைய கேள்வியெல்லாம் 16 ஆண்டு காலம் மத்தியில் திமுக ஆட்சியில் இருந்தபோது என்ன செய்தது என்பதுதான்.