கோயில் காவலாளி கொலை வழக்கு: 6 பேரிடம் சிபிஐ மீண்டும் விசாரணை

சிவகங்கை மாவட்டம், மடப்புரம் கோயில் காவலாளி அஜித்குமார் கொலை வழக்கில், அவரது சகோதரர் நவீன்குமார் உள்பட 6 பேரிடம் சிபிஐ அதிகாரிகள் செவ்வாய்க்கிழமை மீண்டும் விசாரணை நடத்தினர்.

- 

மதுரை/மானாமதுரை/சிவகங்கை, ஜூலை 22:

நகை திருட்டு புகார் தொடர்பாக விசாரணைக்கு அழைத்துச் செல்லப்பட்ட மடப்புரம் கோயில் காவலாளி அஜித்குமார், தனிப்படை போலீஸாரால் அடித்துக் கொல்லப்பட்டார். இதுதொடர்பாக தனிப்படை போலீஸார் 5 பேரையும் திருப்புவனம் காவல் நிலைய போலீஸார் கைது செய்து, நீதிமன்றக் காவலில் மதுரை மத்திய சிறையில் அடைத்தனர்.

இதுதொடர்பாக சிபிஐ விசாரணைக்கு தமிழக அரசு பரிந்துரைத்தது. வழக்கின் விசாரணை அதிகாரியாக சிபிஐ துணைக் கண்காணிப்பாளர் மோஹித்குமார் நியமிக்கப்பட்டார்.

முதல் கட்டமாக, சிவகங்கை மாவட்டம், திருப்புவனம், மடப்புரம் கோயில் உள்ளிட்ட பகுதிகளில் சம்பந்தப்பட்ட நபர்களிடம் விசாரணை நடத்தினர்.