முல்லைப் பெரியாறு: 142 அடிக்கு தண்ணீர் தேக்குவதில் தொடரும் சிக்கல்

கேரளம், முல்லைப் பெரியாறு அணை நீர்ப்பிடிப்புப் பகுதிகளில் பருவமழை இயல்பாக உள்ளபோதிலும், ரூல் கர்வ் விதியைக் கடைப்பிடித்து அணையிலிருந்து உபரிநீரை வெளியேற்ற கேரளம் முனைப்பு காட்டி வருவதால், அணையில் 142 அடி உயரத்துக்கு தண்ணீர் தேக்குவதில் தொடர்ந்து சிக்கல் ஏற்பட்டுள்ளது.

- கோ. ராஜன்

தேனி, ஜூன் 27:

முல்லைப் பெரியாறு அணையில் 142 அடி உயரம் வரை தண்ணீர் தேக்கவும், சிற்றணையைப் பலப்படுத்தி அணையின் முழு உயரமான 152 அடி வரை தண்ணீரைத் தேக்கிக் கொள்ளவும் கடந்த 2014, மே 7-இல் உச்சநீதிமன்றம் உத்தரவிட்டது. இதையடுத்து, கடந்த 2014, நவ. 21, கடந்த 2015, டிச. 7, கடந்த 2018, ஆக. 16 ஆகிய தேதிகளில் முல்லைப் பெரியாறு அணையில் 142 அடி உயரம் வரை தண்ணீர் தேக்கப்பட்டது.

இந்த நிலையில், கடந்த 2018-இல் கேரளத்தில் பலத்த மழையால் வெள்ளச் சேதம் ஏற்பட்டது. அப்போது, முல்லைப் பெரியாறு அணையிலிருந்து முன்னறிவிப்பின்றி 13 கதவணைகள் வழியாக கேரளப் பகுதியில் தண்ணீர் திறந்துவிட்டது தான் வெள்ளச் சேதத்துக்கு காரணம் என்று கேரளம் சர்ச்சையை எழுப்பியது.

நீதிமன்றத்தில் கேரளம் முறையீடு: இதனால், முல்லைப் பெரியாறு அணையின் அதிகபட்ச நீர்மட்டம் 142 அடி என்பதை மறுவரையறை செய்ய வேண்டும் என கடந்த 2019-இல் உச்சநீதிமன்றத்தில் கேரளம் முறையிட்டது. இந்த வழக்கை விசாரித்த நீதிமன்றம் அணையின் செயல் திறன், கருவிகளின் கண்காணிப்பு, 'ரூல் கர்வ்' என்ற விதி வளைவை இறுதி செய்தல், கதவணை இயக்க அட்டவணையைச் சரிசெய்தல் ஆகியவை குறித்து அறிக்கை தாக்கல் செய்ய அணை கண்காணிப்புக் குழுவுக்கு உத்தரவிட்டது.

'ரூல் கர்வ்' நீர்த்தேக்க அட்டவணை