தமிழகத்தில் மருத்துவப் படிப்புகளுக்கு விரைவில் கலந்தாய்வு: அமைச்சர் மா.சுப்பிரமணியன்

தமிழகத்தில் மருத்துவப் படிப்புகளுக்கு விரைவில் கலந்தாய்வு நடத்தப்படவுள்ளதாக மருத்துவம் மற்றும் மக்கள் நல்வாழ்வுத் துறை அமைச்சர் மா.சுப்பிரமணியன் தெரிவித்தார்.

- 

கோவை, ஜூன் 15:

கோவை அரசு மருத்துவமனையில் செயற்கை கருத்தரிப்பு மையம் உள்பட 4 திட்டங்களை அமைச்சர் மா.சுப்பிரமணியன் ஞாயிற்றுக்கிழமை தொடங்கிவைத்தார்.

பின்னர், செய்தியாளர்களிடம் அவர் கூறியதாவது:

கோவை அரசு மருத்துவமனையில் ரூ.2.45 கோடியில் நீராவி சலவை அமைப்பு கட்டும் பணி நிறைவடையும் நிலையில் உள்ளது. ரூ.9.65 கோடியில் மழைநீர் வடிகால் வசதி செய்யப்பட்டுள்ளது. இதுதவிர, ரூ.4.3 கோடியில் மாணவர்களுக்கான விடுதி கட்டடம், பச்சிளம் குழந்தை பராமரிப்பு உள்ளிட்ட பல்வேறு பணிகள் நடைபெற்று வருகின்றன.

புற்றுநோய் பாதிப்பைக் கண்டறியும் 'பெட் சிடி ஸ்கேன்' வசதி தற்போது கோவை, சேலம், தஞ்சை உள்பட 5 இடங்களில் அமைக்கப்பட்டுள்ளன. மேலும், 4 இடங்களில் அமைக்க நடவடிக்கை எடுக்கப்பட்டு வருகிறது.