மதுரை வைகையில் மண்டூக முனிவருக்கு சாப விமோசனம்

மதுரை அழகர் கோவில் கள்ளழகர் கோயில் சித்திரைத் திருவிழாவின் முக்கிய நிகழ்வுகளில் ஒன்றான மண்டூக முனிவருக்கு சாப விமோசனம் அளிக்கும் ஐதீக நிகழ்வு மதுரை வைகையாற்றில் செவ்வாய்க்கிழமை நடைபெற்றது.

- 

மதுரை, மே 13: இதில் திரளான பக்தர்கள் பங்கேற்று சுந்தரராஜப் பெருமாளை வழிபட்டனர்.

மதுரை அழகர்கோவில் கள்ளழகர் கோயில் சித்திரைத் திருவிழாவையொட்டி, அழகர் பச்சை பட்டுடுத்தி தங்கக் குதிரை வாகனத்தில் வைகையாற்றில் திங்கள்கிழமை காலை எழுந்தருளினார். இதில் லட்சக்கணக்கான பக்தர்கள் பங்கேற்று அழகரை தரிசனம் செய்தனர். இதைத்தொடர்ந்து, ராமராயர் மண்டபம் அருகே தீர்த்தவாரி நடைபெற்றது. அப்போது, அழகர் வேடமிட்ட ஆயிரக்கணக்கான பக்தர்கள், சுவாமி மீது தண்ணீரைப் பீய்ச்சி நேர்த்திக் கடன் செலுத்தினர். இதையடுத்து, திங்கள்கிழமை பகல் 12 மணிக்கு ராமராயர் மண்டகப்படியில் எழுந்தருளினார். பின்னர், பிற்பகல் 3 மணிக்கு அழகர் புறப்பாடானார். இதைத் தொடர்ந்து, மதிச்சியம், அண்ணாநகர், சாத்தமங்கலம் பகுதிகளில் உள்ள நூற்றுக்கணக்கான மண்டகப்படிகளில் எழுந்தருளிய அழகர் திங்கள்கிழமை இரவு 9 மணிக்கு வண்டியூர் வீரராகவப் பெருமாள் கோயிலைச் சென்றடைந்தார். பின்னர், இந்தக் கோயிலில் அன்றிரவு அழகர் திருமஞ்சனம் ஆனார்.