பிகார் மேலவையில் நிதீஷ் - ராப்ரி தேவி கடும் வாக்குவாதம்

முதல்வரை 'கஞ்சா அடிமை' என குற்றஞ்சாட்டியதால் பரபரப்பு

- 

பாட்னா, மார்ச் 12: பிகார் சட்ட மேலவையில் முதல்வர் நிதீஷ் குமாரும், எதிர்க்கட்சித் தலைவர் ராப்ரி தேவிக்கும் இடையே புதன்கிழமை கடும் வாக்குவாதம் ஏற்பட்டது.

பின்னர் செய்தியாளர்களிடம் பேசிய ராப்ரி தேவி, 'முதல்வர் கஞ்சாவுக்கு அடிமையானவர் போல பேசுகிறார்' என்று குற்றஞ்சாட்டியதால் பரபரப்பு ஏற்பட்டது.

பிகாரில் இந்த ஆண்டு இறுதியில் சட்டப்பேரவைத் தேர்தல் நடைபெறவுள்ள நிலையில், ஆளும் ஐக்கிய ஜனதா தளம், பாஜக உள்ளிட்ட கட்சிகள் அடங்கிய கூட்டணிக்கும், ராஷ்ட்ரீய ஜனதா தளம் (ஆர்ஜேடி), காங்கிரஸ் உள்ளிட்ட கட்சிகள் அடங்கிய எதிர்க்கட்சிகள் கூட்டணிக்கும் இடையே கருத்து மோதல் தீவிரமடைந்துள்ளது.

முக்கியமாக ஆர்ஜேடி கட்சி முதல்வர் நிதீஷ் குமாரைக் குறிவைத்து தொடர்ந்து கடுமையாக விமர்சித்து வருகிறது. லாலு-ராப்ரி தம்பதியின் மகனும், பிகார் சட்டப்பேரவை எதிர்க்கட்சித் தலைவருமான தேஜஸ்வி யாதவ், 'முதல்வர் நிதீஷ் குமார் மனநிலை பாதிக்கப்பட்டவர் போல நடந்து கொள்கிறார்' என்று ஏற்கெனவே விமர்சித்திருந்தார்.