நிகழாண்டு இறுதிக்குள் தடையற்ற வர்த்தக ஒப்பந்தம்

இந்தியா-ஐரோப்பிய யூனியன் முடிவு

- 

புது தில்லி, பிப். 28: இந்தியா-ஐரோப்பிய யூனியன் இடையே மிகப் பெரிய தடையற்ற வர்த்தக ஒப்பந்தத்தை நிகழாண்டு இறுதிக்குள் மேற்கொள்ள இருதரப்பும் தீர்மானித்துள்ளன.

தில்லியில் பிரதமர் நரேந்திர மோடி, ஐரோப்பிய ஆணையத்தின் தலைவர் உர்சுலா வான் டெர் லியன் இடையிலான பேச்சுவார்த்தையில் இந்த முடிவு மேற்கொள்ளப்பட்டது.

பாதுகாப்பு, நவீன தொழில்நுட்பம் போன்ற முக்கியத்துறைகளில் வியூக கூட்டுறவை விரிவாக்கவும் இரு தலைவர்களும் உறுதிபூண்டனர்.

அமெரிக்க அதிபராக டொனால்ட் டிரம்ப் பதவியேற்ற பிறகு வரி விதிப்பு தொடர்பாக அந்நாட்டுக்கும் ஐரோப்பிய யூனியனுக்கும் இடையே பிரச்னைகள் எழுந்துள்ளன.

உக்ரைன் போர் விவகாரத்தில் ஐரோப்பிய நாடுகளிடம் இருந்து விலகி ரஷிய ஆதரவு நிலைப்பாட்டை டிரம்ப் மேற்கொண்டுள்ள சூழ்நிலையில், மேற்கண்ட முடிவுகள் முக்கியத்துவம் பெற்றுள்ளன.

ஐரோப்பிய ஆணையத்தின் தலைவர் உர்சுலா வான் டெர்லியன், பல்வேறு துறை ஆணையர்களுடன் இரண்டு நாள் அரசுமுறைப் பயணமாக இந்தியாவுக்கு வியாழக்கிழமை வந்தார்.