செபக்தக்ராவில் தங்கம் 2-ஆம் இடத்துடன் நிறைவு செய்தது தமிழ்நாடு

கேலோ இந்தியா கடற்கரை விளையாட்டுப் போட்டிகளின் (பீச் கேம்ஸ்) கடைசி நாளான சனிக்கிழமை, செபக்தக்ரா விளையாட்டில் தமிழ்நாடு அணி தங்கம் வென்று அசத்தியது.

- நாதன் நடராஜன்

அத்துடன் இந்த ஆண்டு கேலோ இந்தியா பீச் கேம்ஸில் மொத்தமாக 3 தங்கம், 2 வெள்ளி, 3 வெண்கலம் என 8 பதக்கங்களுடன், தமிழ்நாடு அணி 2-ஆம் இடம் பிடித்தது.

2-ஆம் ஆண்டு கேலோ இந்தியா பீச் கேம்ஸ், தாத்ரா-நாகர் ஹவேலி, டாமன்-டையு யூனியன் பிரதேசத்தில் கடந்த 5-ஆம் தேதி தொடங்கி 6 நாள்கள் நடைபெற்றது. பீச் வாலிபால், பீச் கால்பந்து, பீச் கபடி, பென்சாக் சிலாட், செபக்தக்ரா, திறந்த நீர்நிலை நீச்சல் ஆகிய 6 பதக்க விளையாட்டுகள் இதில் அரங்கேறின.

தமிழ்நாடு உள்பட, 33 மாநிலங்கள், யூனியன் பிரதேசங்களில் இருந்து மொத்தம் 1,100-க்கும் அதிகமான போட்டியாளர்கள் இதில் கலந்துகொண்டனர். போட்டியின் கடைசி நாளான சனிக்கிழமை, திறந்த நீர்நிலை நீச்சல், செபக்தக்ரா, பீச் கால்பந்து ஆகிய விளையாட்டுகள் நடைபெற்றன.

செபக்தக்ராவில் மூவர் விளையாடக்கூடிய ஆடவருக்கான டிரியோ பிரிவில், சக்தி விக்னேஷ், எபீன் ரூபன், எம். ராஜா, ஹனுமந்த், ஜீவிதுரை விக்னேஷ் முருகன் ஆகியோர் அடங்கிய தமிழ்நாடு அணி தங்கத்தை தட்டிச் சென்றது.

குரூப் சுற்றில் முதலில் உத்தர பிரதேசத்தை 15-10, 12-15, 15-9 என்ற செட்களில் வென்ற தமிழ்நாடு அணி, அடுத்த ஆட்டங்களில் 15-5, 15-9 என்ற நேர் செட்களில் அஸ்ஸாமையும், 15-8, 15-3 என்ற வகையில் தாத்ரா-நாகர் ஹவேலியையும் சாய்த்தது.