இந்தியப் பொருள்களுக்கு அமெரிக்கா 50% வரிவிதிப்பு: செப்.5-இல் இடதுசாரி கட்சிகள் சார்பில் ஆர்ப்பாட்டம்

இந்தியப் பொருள்களுக்கு 50 சதவீதம் வரிவிதிக்கும் அமெரிக்காவை கண்டித்து செப்டம்பர் 5-இல் இடதுசாரி கட்சிகள் சார்பில் மாநிலம் முழுவதும் ஆர்ப்பாட்டம் நடைபெறும் என்று மார்க்சிஸ்ட் கம்யூனிஸ்ட் கட்சியின் மாநிலச் செயலாளர் பெ.சண்முகம் கூறினார்.

- 

ஒசூர், ஆக. 30:

கிருஷ்ணகிரி மாவட்டம், ஒசூரில் மார்க்சிஸ்ட் கம்யூனிஸ்ட் கட்சி சார்பில் அரசியல் விளக்கப் பேரவைக் கூட்டம் மாவட்டச் செயலாளர் சுரேஷ் தலைமையில் சனிக்கிழமை நடைபெற்றது.

இந்தக் கூட்டத்தில் கலந்து கொள்ள வந்திருந்த அக்கட்சியின் மாநிலச் செயலாளர் பெ.சண்முகம் செய்தியாளர்களிடம் கூறியதாவது: ரஷ்யாவிடம் இருந்து அதிக அளவில் கச்சா எண்ணெய் இறக்குமதி செய்வதால் இந்தியாவில் இருந்து இறக்குமதி செய்யப்படும் பொருள்களுக்கான வரியை அமெரிக்கா 50 சதவீதமாக உயர்த்தி, நமது நாட்டில் பொருளாதார நெருக்கடியையும், வேலை இழப்பையும் ஏற்படுத்தி உள்ளது.

இதனால், இந்தியாவில் குறிப்பாக தமிழ்நாட்டில் ஆயத்த ஆடை உற்பத்தி கேந்திரமான திருப்பூரில் மட்டும் ஏறத்தாழ ரூ. 4 ஆயிரம் கோடிக்கு வருவாய் இழப்பு ஏற்படும் என்று அங்குள்ள உற்பத்தியாளர்கள் தெரிவிக்கின்றனர்.